《特技人》糯米親身上陣做火人「巔峰」走蔥本身都係特技人劇中大部分演員都少用替身！

生活熱話

By Ivory on 03 Sep 2018

Digital Editor

最近大家都比《延禧攻略》吸引住，不惜放棄瞓覺時間，都要追劇。不過，夜晚9點半做嘅本土劇集《特技人》，都好值得我哋關注。

Photo from 方紹聰Instagram

套劇上映咗冇耐，觀眾們都認為《特技人》嘅演員唔係親身上陣，《特技人》真係搵番特技人做，演員們都係做個樣。

不過，呢個就唔係事實嘅全部。

喺啱啱過咗去嘅星期四嗰集《特技人》，就講到「糯米」（方紹聰飾演）親身上陣做特技人--火人。

Photo from 《特技人》

劇中嘅「糯米」就因為知道女朋友大咗肚，為咗搵奶粉錢，不惜接呢個咁危險嘅Job。喺工作人員幫佢搽勻防火啫喱，不斷叮囑點火上身之後要做嘅事，準備點火嘅時候，「津津」（傅嘉莉飾演）突然打電話嚟，想話比「糯米」（方紹聰飾演）知，佢女朋友出咗事。「飛邊」（林師傑飾演）一收到「津津」電話之後，冇即刻同「糯米」講，驚佢分心受傷。

Photo from 《特技人》

喺劇入面，「飛邊」（林師傑飾演）、「走蔥」（羅浩銘飾演）、「大志哥」（譚俊彥飾演）都好緊張企喺片場入面睇。

Photo from 娛樂新聞台

而現實中，邊止咁少人替佢擔心？

方紹聰接受傳媒訪問嘅時候話：「佢自己喺TVB做咗8年，從來冇人同佢講過咁嚴肅嘅說話。拍火人嗰日，所有工作人員都100%嚴肅，連臨時演員都唔敢出聲。」

本身拍「火人」，劇組真係已經準備咗一個替身比佢（郭卓樺--TVB金牌綠葉）。但佢自己就好想試下。

Photo from 郭卓樺微博

因為佢呢個要求，Roger師傅就比佢試一個shot先。一開始就由手開始。

Photo from 《特技人》

拍攝當日，「糯米」一到，Roger師傅同替身郭卓樺即刻叫佢除衫，將啲防火啫喱搽喺身上，一共搽咗4層，戴埋防火頭盔，做足準備。

Photo from 《特技人》

「糯米」憶述拍攝期間嘅事話：「平時師傑同浩銘都會同我講笑，但嗰刻佢哋好嚴肅咁同我講小心啲。雖然我心底係有啲驚，但因為卓樺師傅叫我唔好驚，因為一驚就會出事。一定要跟指令行事，做多/做少都有機會出現意外。」

Photo from 《特技人》

方紹聰就話嗰日燒咗7/8次，頭一個 shot只係燒咗6-7秒，做完之後工作人員們都問佢感覺如何。佢覺得自己控制到就繼續拍。

方紹聰描述番嗰陣嘅情況話，一Cut機佢哋就會即刻過嚟救火，之後問佢有冇覺得邊個位熱。佢補充，因為有啲啫喱喺度，唔會即時感覺到熱力。啲熱力會慢慢滲入皮膚，如果即時冇好好處理，之後有機會會燒傷。

之後，每拍多一個shot，防火啫喱就越搽越多。可能呢個舉動，令佢越嚟越緊張，或者係電油問題，搞到佢眼瞓，最後燒到7/8次，就開始頂唔順。

Photo from 《特技人》

在場工作人員非常重視呢次拍攝，方紹聰都未講到出口，師傅即刻走埋去同佢講今日完咗。

Photo from 《特技人》

佢呢份親力親為嘅勇氣，係劇中其他演員互相感染。佢話：「第一個係朱晨麗。佢本身唔係一個動作演員，但率先親自上陣。」身為大家大佬嘅「齊大志」，梗係經常親自上場，咩都唔怕。佢話：「有一幕戲係要譚俊彥碌落山崖，但係譚俊彥就同佢講：『你做火人都唔驚，我又有咩好驚？』」

由之前套《天命》，好多人都覺得佢係借佢爸爸狄龍個名先可以一入TVB就做主角。但事實上，主角唔易做。做主角又唔錫身嘅人又有幾多個？

有份拍攝火場嘅團隊都讚方紹聰有GUTS，仲話由演員做火人嘅十幾年只有幾個。佢哋話對上一個可能已經係張衛健做孫悟空。

方紹聰講番佢嗰陣心態，表示佢將自己放到好低，同埋呢套劇比佢更有知名度嘅人大有人在。既然佢哋都唔顧自己受傷，放膽去做，自己就更加冇理由企喺側邊睇！

本身係特技人嘅「走蔥」（羅浩銘），做慣危險動作嘅佢，又點會假手於人？佢喺佢入面好多場口都係親身上陣。

有一幕佢要由3層樓高嘅地方跳落地下。本身監製已經安排咗替身，仲重覆問佢：「都幾高下咖喎，真係唔洗？」走蔥（羅浩銘）牙眨眨話：「替身比有需要嘅人啦～」點知去到先發現，高到望唔到。原來唔係普通3層樓，而係工廠大廈嘅三層樓，即係差唔多6層樓高（20米）。

Photo from 羅浩銘Facebook

拍攝期間曾經出現小意外，跳緊嘅時候，個場務突然大嗌唔好跳住！原來負責「威也」嘅師傅受咗傷，冇辦法拉實「威也」，嚇到羅浩銘即刻搵嘢拉住，驚到標晒冷汗添！

《特技人》唔單止係道出行內特技人嘅辛酸，讚揚佢哋嘅付出，仲係突顯一班演員敬業樂業嘅精神。做主角唔一定要錫身。凡事親力親為，努力嘅成果，所有人有目共睹！

雖然劇中嘅演員暫時唔算太出名，但大家可以從呢套劇開始認識佢哋，欣賞佢哋精湛嘅演技之餘，仲學習佢哋唔怕蝕底嘅精神！

糯米--方紹聰（奶仔）：
方紹聰（1987年7月29日）--2009年加入第24期無線電視藝員訓練班，曾經參演過多套電視劇。例如：《怒火街頭》、《降魔的》、《宮心計2》、《收規華》、《愛·回家》、《棟仁的時光》......。雖然以前好多套劇佢嘅角色唔算起眼，但今次《特技人》的確令人眼前一亮！