盤點10月5大秋季日劇 題材豐富 演員陣容強勁 劇迷又有劇可以煲啦～

又到咗10月，各大電視台嘅秋季日劇開始陸續播出，小編精選5套日劇，睇下佢哋嘅演員陣容、劇情等等。

1. 《無法成為野獸的我們》

Photo from 《無法成為野獸的我們》Twitter

Photo from 《無法成為野獸的我們》Twitter

講到秋季日劇，不可不提由結衣bb主演嘅《無法成為野獸的我們》，結衣同《逃恥》編劇野木亞紀子已經夠晒吸引啦！

《無法成為野獸的我們》係野木亞紀子所寫嘅原創劇本，佢擔任編劇嘅《逃跑雖可恥但有用》雖然係漫畫改編，但係之後佢寫嘅原創劇本《Unnatural/非自然死亡》亦有好好嘅口碑，更加一舉奪得《2018年CONFiDENCE日劇大獎冬季最佳編劇獎》同埋《2018年第96回日劇學院賞最佳編劇獎》，證明咗野木亞紀子寫劇本嘅功力。

《無法成為野獸的我們》故事講述結衣bb飾演外表可愛工作出色嘅OL，與田中圭飾演的男友拍拖多年，感情穩定，但內心對工作同戀愛都感到疲憊。而松田龍平飾演嘅精英會計師，事業順利，深受女士歡迎，但其實並唔相信任何人。一對外表形象完美但內心疲憊的男女人相遇，渴望撕下面具，擺脫內心束縛自由咁生活。

今次係野木亞紀子第四度同結衣合作，而男主角松田龍平就同結衣BB相隔11年再度合作，加上有《大叔的愛》春田田田中圭加盟，陣容真係無得輸！難怪消息傳出之後就引起一眾劇迷嘅熱切期待喇！

首播日期：10月10日

2. 《中學聖日記》

Photo from 《中學聖日記》Twitter

Photo from 《中學聖日記》Twitter

《中學聖日記》係改編自同名漫畫，由日本人氣女演員有村架純主演。

故事講述有村架純飾演嘅25歲老師末永聖有一位Long D（遠距離戀愛）嘅未婚夫，而佢初次做老師，學生黑岩晶就對她一見鍾情，有村架純周旋喺兩男之間，同學生發展出禁斷師生戀。

學生黑岩晶由19歲小鮮肉岡田健史飾演，今次係佢首次擔任男主角，兩位主演顏值咁高，睇佢哋談戀愛一定令大家少女心爆發！

首播日期：10月11日

3. 《LEGAL V ～前律師・小鳥遊翔子～》

Photo from 《LEGAL V ～前律師・小鳥遊翔子～》Twitter

Photo from 《LEGAL V ～前律師・小鳥遊翔子～》Twitter

《LEGAL V ～前律師・小鳥遊翔子～》係由《Doctor-X》幕後原班人馬炮製，加上Doctor-X米倉涼子主演，真係不得了！

故事講述米倉涼子飾演嘅惡魔律師失去律師資格，成為無牌律師，佢率領各有前科嘅人組織律師團隊，對抗大型法律事務所，為咗幫助委託人而調查案件。

《LEGAL V ～前律師・小鳥遊翔子～》除咗米倉涼子，仲有向井理、《大叔的愛》入面飾演「阿牧」林遣都，演員陣容簡直係星光熠熠！

首播日期：10月11日

4. 《大戀愛～與忘記我的你～》

Photo from 《大戀愛～與忘記我的你～》 Twitter

Photo from 《大戀愛～與忘記我的你～》 Twitter

《大戀愛～與忘記我的你～》由戶田惠梨香擔正，係一套純愛劇。

故事講述飾演女醫生北澤尚嘅戶田惠梨香自細喺女性包圍中長大，從來未曾真正投入戀愛，直到佢搬屋嗰陣認識咗喺搬運公司打工嘅前小說家間宮真司，並愛上咗佢，並決定要同佢戀愛，但喺呢個時候北澤尚發現患上阿茲海默病，身體機能會逐漸退化，而間宮真司眼見戀人患病，決定寫一本關於佢同北澤尚兩個人生活同愛情嘅小說。

呢個故事令小編諗起《一公升眼淚》，可以想像套劇一定會十分催淚！

首播日期：10月12日

5. 《我和西波與神樂坂》

Photo from 《我和西波與神樂坂》Twitter

Photo from 《我和西波與神樂坂》Twitter

鍾意小動物嘅朋友仔，呢套劇就啱晒你！《我和西波與神樂坂》改編自同名漫畫，由相葉雅紀同廣末涼子擔任主演，個陣容已經好有睇頭！

故事講述相葉雅紀飾演嘅年輕獸醫高円寺達也喺富有人情味嘅小區入面經營緊一間動物醫院，而廣末涼子就飾演護士加藤季和，係一個單親媽媽，本身喺設備最先進嘅動物醫院做護士，之後因為發生咗某件事而轉到高円寺達也嘅動物醫院，故事同動物善終護理有關，以及獸醫同動物主人之間嘅交流。

睇劇情已經覺得好溫暖喇！相葉雅紀喺《志村動物園》有好多同小動物交流嘅經驗，今次飾演獸醫應該難佢唔到！

首播日期：10月12日

淨係睇劇情都已經令人期待爆燈！秋季日劇套套都卡士強勁，劇迷唔洗怕無劇可煲啦！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）