世界雞蛋日！食雞蛋都可以睇性格？鍾意咩煮法嘅雞蛋 睇你到底係咩人！

Oh yeah原來今日係世界雞蛋日，話說好似身邊點都會有個雞蛋控，食乜都要有雞蛋，覺得食All-day breakfast最重要就係隻蛋。其實小編自己都覺得雞蛋好好食㗎！煮法又多，而且早前仲有日本研究證實「雞蛋高膽固醇」係謬誤，真係越食越happy！

而咁多款嘅煮法，你哋又有無偏好邊款多啲呢？英國雞蛋協會就向1千多名成年人進行調查，以人傾向鍾意邊種煮法嘅雞蛋，去分析佢哋嘅性格。分別分成烚蛋類、荷包蛋、炒蛋、水波蛋4款。好，依家俾10秒你諗，最鍾意食嘅係....

1. 烚蛋類

烚蛋包括白烚、滷蛋、茶葉蛋等等，研究發現鍾意食烚蛋嘅人，佢哋生活比較無乜秩序、粗心大意同衝動。

2. 炒蛋

相反，鍾意食炒蛋嘅人個性比較謹慎，同時亦都比較固執唔變通。同時發現鍾意食炒蛋嘅人比起其他蛋愛好者更多屬於管理層或者senior，並擁有自己物業。

3. 水波蛋

鍾意食水波蛋嘅朋友，個性活潑外向、個人較開心。另外亦有發現，平均水波蛋愛好者以女士居多，而且都擁有不多於一個兄弟姐妹。

4. 煎蛋

煎蛋黎講呢，太陽蛋又好荷包蛋又好，總之鍾意食煎蛋嘅朋友就性慾比較高漲嘅～而且仲發現，多數以年輕同男士居多。

5. 奄列

鍾意食奄列嘅人則比較自律，較多擁有整潔嘅屋企。

呢啲研究咪大家笑吓囉，睇完就算，唔洗太認真啦～你哋自己或者朋友又屬於邊種人呢？

Photo from：shutterstock

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）