「真.殺人犯」上節目覆述當時犯罪心態/情況沈鵬：最痛苦嘅懲罰唔係你坐監，而係「孽隨身」！

By Ivory on 12 Oct 2018

Digital Editor

沈鵬曾經係一個獲判終生監禁嘅殺人犯，做齊「嫖賭飲蕩吹」，佢喺節目入面都以窮凶極惡嚟形容自己。佢喺1997年喺英國獲假釋，番返香港。

Photo from 《罪光燈》

富二代生活糜爛聲色犬馬
沈鵬家境非常富裕，爸爸經營珠寶生意，喺半島酒店、香港酒店，甚至美國都有生意。不過佢係二奶仔，難聽啲講即係私生子。

爸爸不斷做生意搵錢，媽咪就周圍應酬、賭錢，所以從小缺乏家庭關注同照顧。14歲前仲係on居居，15歲先小學畢業（喺監獄先知，自己有讀寫障礙）。就喺佢15、6歲就已經去舞廳、色情場所（俗稱：魚蛋檔）。群埋一班黑社會，黑社會因為知道佢嘅身分勢力，就自然多人識，得閒就同人開片，佢就負責響朵。

佢有個細佬喺英國讀書。有一日佢爸爸就叫咗佢坐低傾。佢爸爸就同佢講：「其實我都唔想送你出國，我覺得好晒錢！不過當搏下～」佢嗰時心諗「當遊埠」囉～但去到英國，佢番咗幾日學就冇番！

因為生活苦悶，染賭癮！（店舖好早關晒，睇電影又睇晒！開得最長時間嘅就喺Casino賭場）有一次，輸咗幾百鎊，唔忿氣，要攞番，咁就出事！

佢決心返工！但佢返工唔係為咗還債，佢當時根本唔洗攤大手板問人借，只要開句聲就好多人借錢比佢，因為佢地覺得一定有得還！佢返工就係想戒賭癮！

返工嘅老闆Robert好信任佢，但都幫唔到佢戒賭！之後有次同朋友喺酒吧吹水，講起打劫好易，就由佢「扑槌」打劫！

Photo from 《罪光燈》

唔熟唔食打劫殺人
當年係1981年，佢本身仲有2個朋友一齊，有一個就臨時甩底。佢另一個FD就喺佢打劫前，同佢講咗一句：「陣間攞完錢，還完債，即走！我一個仙都唔要！」

但沈鵬補充話：「老闆娘好好人，冇人喺佢屋企住過！我係第一個！」

主持區錦棠問：「點解要揀自己人？你唔覺得忘恩負義？」佢答：係！但嗰時唔諗咁多，只係想解決問題（欠債）。

最後佢偷咗現金千幾鎊，拎埋自己媽媽放低嘅首飾～

Photo from 《罪光燈》

本身拎完走得，點知一打開大門就見到女房東11歲嘅女（Elaine)
當時唔知點做，本身冇諗住殺人，但佢不斷喺到鬧：「我媽咪幾錫你.......」

之後佢就同同黨講：「扑暈佢走啦！」沈鵬話：「我以為睇粵語長片咁，一扑就暈！」

當時拎左張凳仔扑佢，點知，一扑佢就大叫，嗰刻好似好多10幾年嘅影片喺個腦到走出嚟，但同時隻手就不斷扑！扑到佢唔識嗌！本身可以當失咗理性，但之後就開始陰毒喇！

「我唔可以話我好錫佢，但都當佢係妹妹咁，周圍帶佢去玩～」沈鵬開始面對唔到自己：「又偷人嘢，Auntie又對我咁好！」「我唔想比人知，亦唔敢比人知！」突然間就生咗惡念：把心一橫殺人放火！

Photo from 《罪光燈》

望到條電話線，就蚊咗過嚟，cool 住佢條頸，然後比條線同黨，一人一頭！

女房東作供表面插佢實際幫佢
上庭作供嘅時候，「佢就喺我前面，我唔敢面對佢！」女房東以德報怨，作供時自己額外加多咗句：「Elaine唔鍾意佢！」街外人都以為女房東插緊佢，但佢知道，女房東係幫緊佢。如果佢話elaine 好鍾意佢，就會令個官覺得佢更衰！

Photo from 《罪光燈》

坐監曾被雞姦、被人用圓規刺背險終生癱瘓
佢講番以前坐監嘅時候同一個囚犯行得好埋，其他囚犯話：「嗰個人曾經喺監獄殺人，仲劏開人哋個腦，係一個變態犯！」但佢冇聽，之後就比呢個變態犯雞姦。

Photo from 《罪光燈》

又有一次，佢畀其他犯人用圓規刺背！「本身只係痛，半個鐘後就癱咗，郁唔到！醫生同佢講，「你都算好彩，再過多半釐米，你就會終生殘廢！」

呢件事之後，佢望住本聖經，覺得好苦涰，喺度諗：「點解要做好人！」所以對住天花板發誓，「從此唔做好人！佢哋踢我一腳，我要還番佢哋10腳！」

Photo from 《罪光燈》

佢再講：「最痛嘅唔係傷口，而係『腦』！要鬥智鬥力，佢行到邊，跟到邊！仲慘過我捅番佢轉頭！」

搖身變大毒梟再遇仇人
開頭比人利用帶毒品，但後來覺得有利可圖，跛豪係佢當時嘅偶像！
之後遇番搵人捅我幾刀嘅嗰個人，但係我做緊大生意，我就好有風度行上前同佢握手！點知幾日後，有嘅第二個監獄之前嘅朋友同我講：「佢買咗兩條友隊冧你！」佢話：我幫你搞掂佢！我即刻話：「唔洗！佢係我咖！我要比佢知，我唔再係10年前嗰條?仔！」