袁富華由閒角榮升金馬獎最佳男配角 入行30年實力終受認證

昨晚出爐嘅金馬獎「最佳男配角」由袁富華憑電影《翠絲》得獎。袁富華呢個名，或者大家都唔係太熟悉，其實袁富華已經從影近30年，即使開演閒角或配角，但都無阻佢對演戲嘅熱誠，今年金馬獎更打敗一眾對手，演技終獲認證！

袁富華可以話係電影界嘅「綠葉王」。佢三十年前已開始做舞台劇演員，又演出過電影同港台劇，作品無數但最深入民心嘅，相信只係佢喺《喜劇之王》入面，演繹質問星爺「你唔係外賣仔！」嘅黑幫大佬。

Photo from 喜劇之王

Photo from 喜劇之王

袁富華除咗攞過一次舞台劇男配角獎，其他提名都只屬陪跑。雖然常常與獎無緣，知名度又一般，但袁富華依然堅持理想咁多年，真係唔容易！

Photo from 衛視電影台

Photo from NOW

首次獲金馬獎提名就獲獎，袁富華都表示「好似發夢咁」，上台攞獎時更激動泛淚：「三十而立、四十而不惑、五十而知天命，三十年前我做舞台劇演員，六年後有個重大決定，係咪繼續做演員，因為覺得冇乜成就，我真係好喜歡做演員，掙扎咗一晚之後決定繼續做演員。」相信今次金馬獎除咗係對袁富華演技上嘅肯定，同時證明佢多年來對演戲嘅堅持係無錯嘅！

Photo from 翠絲

Photo from 翠絲

而今次佢喺電影《翠絲》演出嘅得獎角色「打鈴哥」，係一個誇性別粵劇花旦。角色外形、戲路都非常「踩界」，衝破框架、敢去演已經唔易，袁富華能夠演活角色，背後下嘅苦功一定唔少！獲獎確係實至名歸！

袁富華有演技又敢演，希望未來可以睇到佢有更多出色演出，同埋可以擔正電影主角啦！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）