【善良的犯人】美國服刑囚犯出動「專業技術」 拯救被困車廂BB

上星期四喺美國佛崙里達州，有個爸爸抱咗個BB女上車之後，就鎖咗架車同埋揼低條車匙喺前座。鎖咗架車之後，爸爸先發現唔小心鎖咗自己1歲大嘅女兒喺私家車車入面。嗰日陽光普照，太陽直曬住架私家車，再加上車廂侷促嘅環境，令BB處於危險嘅狀態，爸爸非常擔心同著急。

Photo from 影片擷圖

BB嘅爸爸媽媽不斷搵人求救，當佢哋諗住扑爛車窗，救BB出嚟嘅時候，警長Nocco同一班做緊社會服務令嘅囚犯經過，並主動提出幫手。

Photo from 影片擷圖

警長Nocco同意畀囚犯們幫手，佢哋利用衣架，配合佢哋嘅「專業技能」，用咗2分鐘時間就開到車門，成功救番個BB。

Photo from 影片擷圖

事後有傳媒訪問番Nocco警長，佢表示：「有好多佢哋呢類嘅人（今次有份幫手嘅囚犯），曾經做錯事，但一直等待改過自新，回饋社會嘅機會，等佢哋能夠重新做人。」

Photo from 影片擷圖

其實做好人定壞人只係一線之差！邊個會估到當初佢哋用嚟「搵食」嘅伎倆，變成今日救人嘅關鍵？將你嘅小聰明、「特殊技能」用喺正確途徑嘅話，可以幫助好多唔同嘅人；相反，就會誤入歧途！除此之外，我哋亦都需要給予更新人士改過自新嘅機會，唔好對佢哋存有偏見，分分鐘救番你嘅就係佢哋！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）