發哥拍戲意外撞穿個頭 仍敬業假戲真做繼續拍攝 縫針後照開工

最親民嘅巨星周潤發發哥，從影多年，多次奪得金像獎影帝，無論台前幕後都對佢讚口不絕，同佢嘅專業嘅工作態度好有關係。

發哥日前喺新戲《驕陽歲月》嘅片場埋位期間發生意外，唔小心撼穿個頭，但仍然堅持繼續拍戲。

意外發生嗰陣發哥無出聲叫停，繼續假戲真做，帶傷演埋成場戲。導演嗌cut之後發哥用手撳住頭頂，自行行出拍攝場景外面坐低，大家先發覺發哥額頭滲緊血，工作人員即刻湧上前檢查發哥傷勢。

Photo from 工作人員提供

Photo from 工作人員提供

見大家咁緊張，發哥就淡定叫大家冷靜。而本來準備緊lunch嘅發嫂收到通知後，見到老公血流披面都忍唔住問：「點解搞成咁？」發哥即刻安慰老婆話唔嚴重。

但由於傷口實在唔算細，本來打算喺片場處理傷口嘅發哥決定聽大家意見去醫院接受治療，臨行前仲發揮喜劇本色安慰大家：「淡淡定，有錢剩！」

Photo from 工作人員提供

在場工作人員事後都忍唔住話：「真心佩服發哥嘅專業態度！」

Photo from 工作人員提供

經檢查後，發現發哥個傷口有成一吋幾長，所以一定要縫針。一聽見要縫針，敬業嘅發哥就話：「我仲要返現場拍攝，又要連戲，唔剃頭髮得唔得啊？」

頭破血流嘅發哥縫足足五針。接受治療之後，發哥即刻趕返片場，繼續埋位拍攝。

入行多年，發哥敬業精神始終如一，有今日嘅成就同佢專業態度不無關係！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）