賞月好去處～香港3大必去靚景：野餐、單車、燒烤、睇日落同圓月～

中秋節就嚟到喇，咁啱撞正星期六日，當然要計劃一下一整天嘅行程啦！今次小編為大家精選咗3個靚景嘅賞月好地方，有啲仲可以玩足成日，同成班friend去熱熱鬧鬧，又或者同另一半去甜蜜地過都無問題！

一、山頂公園
山頂公園係一個好適合賞月嘅地方，山頂係最接近天空嘅公園，同天空嘅距離更近，自然更加大機會睇到又圓又大嘅月亮啦～山頂公園有個大大的草地，如果大家想野餐的話，仲可以自備零食、月餅，又或者係買野飲上去都可以，感受住涼風嘅吹拂而公園上仲有兩個涼亭，有種英式古老建築嘅感覺，有好多人都會喺上面影婚照，絕對係一個打卡嘅好地方～

Photo from PRESSLOGIC

Photo from PRESSLOGIC

山頂公園
地址：太平山柯士甸山道

二、大美督水壩
另一個賞月好去處，就係位於大埔嘅大美督水壩喇～呢度好適合一大班朋友一齊去，可以燒烤、踩單車、放風箏、影相、賞月，由朝玩到夜都無問題！一條長長嘅水壩行到盡頭有種被大海包圍嘅感覺，坐喺水壩上面望住大海、日落，感覺非常寫意，仲可以帶埋燈籠去玩添！不過大家要注意一下，大美督水壩都比較多蚊蟲，如果大家好惹蚊就最好帶枝蚊怕水喇～

Photo from PRESSPLOGIC

大美督水壩
地址：大埔大美督船灣淡水湖水霸

三、嘉頓山
九龍人想賞月，首選當然係嘉頓山啦，喺市區入面地點已經算好便利，不過每次上去都要行條奪命長樓梯，真係好辛苦，但上到去就會見到超靚嘅夜景補償返，行得幾辛苦好值得啊！建議大家可以黃昏時間去行，行到上去就可以見到日落，真係好靚啊～唔少人都會坐喺石上睇住夜景，萬家燈火陪伴著圓圓的月亮，感覺真係好浪漫啊，所以會比較建議大家兩個人去影相，又或者各位影相發燒友都可以去呢～

嘉頓山
地址：石硤尾白雲街石硤尾食水配水庫

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）