台灣熱播劇《浪漫輸給你》女主穿越小說誓要爭奪霸道總裁　宋芸樺張立昂CP感爆燈戲裏戲外都咁甜蜜～

近年韓劇當道，台劇開始比較少人留意，不過呢排小編發現咗一套台灣熱播緊嘅劇集《浪漫輸給你》，由張立昂及連晨翔出演，非常有趣喔，疫情下大家冇得周圍去，喺屋企煲下劇都唔錯。

Photo from marcourageous@ig

《浪漫輸給你》嘅演員陣容非常吸引，男主角是張立昂及連晨翔，張立昂喺劇中一人分飾兩角，而女主角就係大家非常熟悉嘅台灣電影《我的少女時代》嘅「林真心」宋芸樺出演。

Photo from 《浪漫輸給你》

Photo from 《浪漫輸給你》

Photo from 《浪漫輸給你》

故事講述鄭曉恩（宋芸樺 飾）係一個出版社編輯，非常仰慕天亮集團 CEO 賀天行（張立昂 飾），經常利用航拍機偷窺賀天行，有一日竟然偶然目睹賀天行墮樓，後來賀天行重傷住院，鄭曉恩陰差陽錯之下穿越到自己編輯緊嘅小說《總裁你壞壞》當中。當鄭曉恩穿越到小說入面之後，發現自己成為咗皇家集團嘅員工，喺小說入面係一個壞女人嘅角色，而小說嘅男主角就係同賀天行生得一模一樣嘅皇家集團 CEO 司徒傲然（張立昂 飾）。後來鄭曉恩周旋喺司徒傲然同端木青風（連晨翔 飾）之間，誓要打破典型言情小說嘅故事格局，由配角上位做女主角，爭奪霸道總裁。

Photo from marcourageous@ig

故事題材雖然係近年流行嘅穿越題材，不過勝在睇極唔厭，再加上男女主角顏值高，而且劇情輕鬆搞笑，所以喺台灣當地討論度非常高，收視高企。

Photo from marcourageous@ig

張立昂同宋芸樺今次係繼電影《等一個人咖啡》同《灼人秘密》後第三次合作，唔單止默契十足，而且 CP 感爆燈！佢哋戲裏戲外嘅互動既搞笑又甜蜜，令觀眾好難出戲啊！

Photo from hsiang_5208@ig

除咗男女主角之外，劇入面仲有另一對 CP 都不容忽視，就係兩位男主角張立昂同連晨翔啦，兩人喺劇入面係一對好朋友，佢哋之間散發嘅「bromance」都非常「甜蜜」㗎！

Photo from hsiang_5208@ig

《浪漫輸給你》每周日晚上10點播放，依家喺台灣已經播咗十幾集啦，唔鍾意逐集追嘅朋友可以慢慢睇咗之前啲集數先，因為套劇已經進入高潮尾聲位，相信好快就大結局，咁樣大家就唔使慢慢等更新啦，小編之前逐集追，真係等得好辛苦㗎！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）