南柱赫新韓劇《Start Up》搭檔秀智回歸小屏幕　南太太們準備好迎接「老公」喇！

嚟緊10月又有新韓劇追啦！我哋嘅「南朋友」南柱赫回歸小屏幕啦！搭檔「國民初戀」秀智出演 tvN 新劇《Start Up》，呢個高顏值組合真係令人非常期待啊！唔知「南朋友」遇上「國民初戀」會擦出咩火花呢？

Photo from tvN DRAMA@Facebook

呢套劇唔止演員陣容令人期待，就連幕後班底都非常厲害，《Start Up》嘅編劇就係撰寫過《當你沉睡時》、《聽見你的聲音》及《皮諾丘》等大熱作品嘅朴惠蓮，而導演就係執導《德魯納酒店》、《來自星星的你》同《當你沉睡時》嘅吳忠煥，朴惠蓮同吳忠煥繼《當你沉睡時》後再度合作，再加埋華麗嘅演員陣容，簡直係黃金組合！

Photo from tvN DRAMA@Facebook

呢套劇講述年輕人創業，面對挑戰逐漸成長嘅故事。飾演「徐達美」嘅秀智夢想成為好似 Steve Jobs 一樣咁出色嘅人，大學退學之後努力賺錢。而由南柱赫飾演嘅「南道山」就係一間科技公司嘅創始人，可惜公司虧損嚴重。後來兩人相遇譜出戀曲，一齊努力創業及成長。

Photo from skuukzky@ig

Photo from skawngur@ig

除咗男女主角，配角顏值都一樣咁高！有金宣虎飾演為咗還債而創業嘅「韓志平」，同埋姜漢娜飾演又靚又高學歷嘅富二代「元仁」。

Photo from seonho__kim@ig

Photo from k_hanna_@ig

《Start Up》早前已經釋出咗預告片，4 位主演好似行 catwalk 咁，真係型到爆啊！《Start Up》已正式開拍，將會喺 10 月首播，逢星期六、日韓國時間夜晚 9 點播放，大家記住留意啦！準備迎接我哋 10 月嘅新老公！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）