83歲余慕蓮入ICU前向好友留語音道別：若唔醒下世見！傳患血癌情況不樂觀

83歲嘅余慕蓮早前因患肺纖維化需要入院，日前更指佢入咗ICU插喉。有傳余慕蓮患血癌但因身體虛弱，無法打標靶藥治療。佢朋友透露余慕蓮入院前向好友留語音道別，指如果唔醒就下世再見。

現年83歲嘅余慕蓮係大台綠葉，多年嚟為唔少山區兒童捐錢、起學校，係知名嘅慈善家。

近年佢健康情況大不如前，驗出肺部纖維化，早前有報道指佢入咗ICU要插喉，更傳佢確診患血癌，本來要接受標靶藥治療，但因佢身體虛弱，無奈要延遲。

有報道提到佢入院時仍然清醒，有向好友留語音訊息道別，指如果唔醒下世見。

有余慕蓮好友喺社交網站透露佢嘅情況，指醫生話佢肺部暫時未有惡化，會幫佢洗血清同用生物化劑治療，聽日亦會有營養師嚟睇。

另一位好友鄧達智就表示醫生建議佢如果有咩朋友想見可以見一見，依家已經見咗第一批朋友，如果再有聯絡，佢會去醫院探望余慕蓮。

獨身一人嘅余慕蓮多年嚟熱心公益，曾表示離世會捐出所有財產，而鄧達智亦指將財產捐畀慈善機構係余慕蓮嘅心願。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）