許廷鏗無悔離巢預咗被封殺！專注音樂唔拍劇：選擇會尊重我創作嘅唱片公司

TVB《超級巨聲》出身嘅許廷鏗於2017年離開星夢娛樂，佢日前接受訪問時就指自己想打破舒適圈，而且舊公司係電視台，同佢專注做音樂嘅理念有出入，所以選擇一間會尊重佢創作嘅唱片公司。

許廷鏗2009年參加TVB節目《超級巨聲》入行，係「巨聲幫」嘅代表人物，之後簽約星夢娛樂。不過2017年約滿後離巢，加盟華納唱片。

Photo from 許廷鏗Facebook

佢近日接受電台訪問時就透露咗離巢嘅心路歷程。佢指喺舊公司工作安定，所有事都有經理人安排、處理，不過佢意識到再咁落去只會原地踏步。

許廷鏗表示自己想專注做音樂，唔拍劇：「但人哋（舊公司）唔會明」，到佢離巢之前，「巨聲幫」其他人都要拍劇，得佢一個無拍。

Photo from 許廷鏗Facebook

佢又指舊公司係電視台，首選一定係劇集片頭片尾歌，許廷鏗指自己唔抗拒唱劇集歌，但各取所需，想做音樂、行音樂一定係揀唱片公司：「我唔係唔想拍劇，只係我心虛，覺得做歌手都未做得好。」

Photo from 許廷鏗Facebook

許廷鏗表示有諗過會被封殺，但一定有取捨，佢指喺舊公司一次頒獎禮演出非常華麗，有噴火又有女dancer，不過佢身在其位，覺得自己未夠資格。

Photo from 許廷鏗Facebook

許廷鏗話好多謝依家嘅唱片公司，好早已睇到佢喺音樂上嘅發展：「當我想專注行音樂路，一定會選擇一間會尊重我創作或音樂人嘅唱片公司。」

Photo from 許廷鏗Facebook

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）