私隱條款滿城風雨！WhatsApp急出post解畫　原來有兩類人可以豁免？

WhatsApp 改私隱條例一事搞到滿城風雨，人心惶惶，大家都恐懼喺新嘅私隱條款底下，自己嘅個人資料不受保障，要分享晒畀 WhatsApp 嘅母公司 Facebook！不過 Facebook 發言人就為此事作出澄清指有兩種人可以避免依個改動！

WhatsApp 最近嘅改動令大家都唔太滿意，想搵新嘅應用程式去取代平日嘅溝通交流，Tesla CEO Elon Musk 更加走出嚟，喺 Twitter 中發言嗌大家用 Signal 咁話。而除咗 Elon Musk 次外，香港私隱專員亦公開呼籲用戶留意新私隱條款，事關當中涉及 8 大個人資料！

Photo from Elon Musk Official Twitter

面對咁大嘅爭議，Facebook 嘅發言人就表示：原來有兩類人係可以豁免今次嘅私隱條款改動嘅。

WhatsApp 表明依次嘅更新係唔適用於英國同埋歐盟國家嘅用家。就算依個地區嘅用家撳咗同意都好，佢哋嘅資料亦都唔會被 WhatsApp 分享去 Facebook 度嘅。

Photo from WhatsApp Official Twitter

而另一群可以豁免嘅人就係先前已經揀咗唔同 Facebook 分享資料嘅用家啦。其實早喺 2016 年 8 月嘅時候，WhatsApp 就已經改過一次使用條款，話會將用戶資料同 Facebook 分享，不過唔同嘅係，當時嘅用家擁有選擇權，可以揀參與或者唔參與。Facebook 發言人指公司將會履行當年嘅承諾，只要當時選擇咗唔參與，咁今次都唔會分享你嘅個人資料去 Facebook 咁話。

Photo from WhatsApp Official Twitter

如果大家唔記得自己當年揀咗咩，可以打開 WhatsApp，撳右下角「設定」，揀「帳號」，再撳「要求帳號資訊」，就可以收到一份你嘅 WhatsApp帳號資訊和設定報告，睇返當年嘅決定啦！不過要稍等一陣先會收到，一般三日內就會有結果。

Photo from WhatsApp App 內截圖

今次嘅 WhatsApp 風波甚至令 Facebook 大中華區董事都要出面澄清！認真大件事。佢聲稱今次嘅條款更新其實關乎 WhatsApp 嘅商業通訊（WhatsApp for Business），亦強調大家嘅對話係完全受到端對端加密技術保障，WhatsApp 亦唔會將你嘅聯絡人名單同任何人或者機構分享，包括 Facebook。佢亦指出今次嘅更新原意係想提高私隱保護透明度，但就因為要深入說明嘅地方講得唔夠清楚，溝通、表達上出現咗不足嘅情況。

Photo from Jayne Leung@Facebook

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）