洪永城帶女友梁諾妍遊大澳！影靚相放閃被何超蓮陳煒催婚　機智反問：有冇介紹

唔少女生生日除咗希望可以收到另一半精心準備嘅禮物之外，可能就係最想收到另一半幫佢影嘅靚相。而日前正正就係梁諾妍（Inez）嘅33歲生日，身為男友嘅洪永城（Tony）就帶咗對方去大澳打卡睇日落影靚相，過二人世界。

洪永城同梁諾妍拍拖兩年，早已開始同居生活。洪永城日前就趁住女友生日齊齊去咗大澳行吓影吓相，佢仲喺 IG 上傳咗兩張自己嘅作品同大家開心 share，並留言：「名牌嘅禮物故然要啦，不過其實好多女仔心中嘅理想禮物，可能簡單如男友幫佢影一張「靚相」就已經心滿意足。今日我做到喇???祝你 @inez_leong 生日快樂，永永遠遠都開心知足。」

就咁睇字都知佢哋嗰日有幾開心，幾Sweet呀！佢仲 hashtag 指嗰日行程係「#沒有激嬲女朋友系列」，咁睇嚟壽星女都好滿意喎！

不過識睇當然要睇埋留言喇，一班好友張繼聰、黃翠如除咗留言讚佢哋愛得甜蜜，陳煒同賭王千金何超蓮仲乘機催婚：「咁慳皮㗎，起碼都要有求婚戒指啦」、「幾時有得飲呀」，但機智嘅 Tony 就即該反問番佢哋有冇介紹，又指超蓮成日唔喺香港好難請到佢喎!

咁係咪啫係準備有好消息宣布，可以講定恭喜先呀？！

不過除咗同女友梁諾妍慶祝生日之外，佢早前出席活動就指自己喺「女友鞭策下體能提升」一句引嚟唔少人嘅誤會，仲令大家不斷 send message 問候佢「細佬」，搞到佢要出 post 嗌大家唔好再 message 問候我：「你哋唔好再 message 問候我細佬喇，佢好好呀?。」

而向來玩得嘅佢身邊一班好友當然唔會放過機會喇，佢哋嘅留言仲相當搞笑添，「佢好嗎」、「提升到去邊呀」、「兒子生性病父感安慰」等等，就連佢女友Inez都玩埋一份：「今晚繼續」。

睇嚟洪永城又要操體能喇！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）