周柏豪鄭融獻唱《一事無成》予失業人士 網民：聽完仲灰 仲有佢哋都揀錯歌？

各慈善騷經常邀請歌手上台唱熱門歌曲，增加善款，但無因應場合主題揀歌，除時出現反效果。日前，無線舉行《萬眾同心公益金2021》，邀來歌手周柏豪、鄭融合作演唱經典K歌《一事無成》。但由於歌曲獻唱畀一眾失業家庭，所以二人被指贈興，引發公關災難。其實，仲有唔少歌手都曾經「揀錯歌」，佢哋又係邊個呢？

Photo from 周柏豪 微博

周柏豪自表忠成為「愛國歌手」後，風評一落千丈。今次又引起熱議，事緣佢近日為《萬眾同心公益金2021》獻聲，希望為失業家庭打氣。不過，唔知係節目組定其他人為佢哋揀歌，佢同鄭融合唱《一事無成》，當中歌詞包括：「好想好好的打拚 可惜得到只有劣評」。

Photo from TVB

歌詞咁「灰」，難怪有網民認為係「不對的場合唱不對的歌」，指佢哋唔係打氣，而係踩多腳 「係咪笑緊失業人士一事無成？」

Photo from 連登評論

Photo from TVB Youtube 評論

其實，《一事無成》係2008年首發，一推出即成大熱。所以，依首歌以後就變咗鄭融及周柏豪出騷必唱曲目。但因為咁，令《一事無成》偶爾出事。鄭融同周柏豪曾於2008年8月3日出席一個放榜活動，在放榜前夕為考生打氣，當時佢哋向學生獻唱《一事無成》：「假如凡事都失敗 也許得愛戀先可以得勝」，真係唔知在場考生有咩感受。下圖係二人於上年為某抗疫慈善音樂會獻唱該熱門曲，可見其經典程度。

Photo from Sshins Music Corner

當晚亦有令一「應景」曲目出現，不過，佢嘅環節未如周柏豪及泳兒般尷尬。因為，節目播出獨居長者受訪片段後，到蕭正楠、區永權演出，再進行支票頒發環節，才到泳兒出場獻唱新歌《孤毒》，中間有其他間場，令「應景」效果無咁明顯，當中歌詞包括：「離不開 叫孤獨」。

Photo from TVB

其實，唔只以上歌手，陳偉霆亦都曾經喺為考生打氣嘅放榜活動上獻唱《今天終於知道錯》，歌詞包括：「明明很想開口認錯 明明清楚早惹禍」，歌名同歌詞都咁悲，現場考生聽到真係百感交集。

Photo from 陳偉霆 微博

有網民表示，佢仲記得Kary吳雨霏曾於某籌款節目大唱《分手要狠》，當中歌詞包括：「說再見不要坐近 別扶助病困」，真係好「溫暖」。

Photo from 吳雨霏 FB

有其他網友表示，張敬軒曾為日本地震關愛慈善騷獻唱歌曲《餘震》，歌詞包括：「天地淪陷 餘震是痛苦中 一絲興奮」，未免太過應景。

Photo from 張敬軒 FB

另有網民指，藍奕邦曾為某慈善節目表演，節目同時邀請咗法師觀賞，藍奕邦當時獻唱歌曲《晚晚禮拜六》，當中歌詞有：「晚晚也是禮拜六 哪個守齋不食肉」雖不至公關災難，但有網民好奇在場法師聽完係咩心情。

Photo from fafaflowers Youtube

其實，唔只以上歌手，連四大天王之一黎明都曾經差啲唱出不合場合嘅歌，佢本人曾表示，多年前去做慈善活動，探訪患智障小朋友，大會本來想佢唱當時大熱歌曲《傻癡癡》，但黎明有感當時場合及人員唔適合出現呢首歌，為咗唔想惹起誤會，佢最後婉拒提議。有網民指，黎天王果然功架十足，醒目非常，所以得佢一個倖免公關災難。

Photo from Angus Chow FB

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）