月偏食2021｜最佳觀賞時間、地點、網上直播連結一覽！錯過要等一年先再有得睇！

今個月有月偏食睇！係繼5月以嚟又一次月食，據天文台資料今次天氣更有利於市民觀賞，即睇最佳觀賞時間表、地點、網上直播連結，如果錯過今次月偏食就要等到下年先再有月食睇啦！

月偏食最佳觀賞時間

根據香港太空館同天文台，月偏食將於2021年11月19日出現。當日月球會於17:38東升，月亮升起之時「食甚」階段已經結束，所以呢次現象又稱為「帶食出」。

成個月偏食過程由月出17:38開始，直到20:06月球離開地球半影時結束，時長約為2個半鐘。

月食成因

當太陽、地球、月球三者排列成一線，月球進入地球影子嘅時候，月食就會發生。月食可分為半影月食、月偏食及月全食三種。月球進入地球半影時，會先發生半影月食；當月球進入地球本影時則為月偏食。

如果月球被地球本影完全遮蓋，就係月全食。月偏食嘅過程可分為半影食始、初虧、食甚、復圓及半影食終5個階段，而今次月偏食香港只能睇到最後兩個階段。

觀賞月食地點推介

月亮將出現於東邊，而且因為今次月食時月球仰角較低，天色又未全黑，香港太空館建議喺選擇觀測地點時，要特別留意東北偏東嘅障礙物高度。

月偏食觀賞條件

據香港太空館資料，11月19號傍晚6點，月球離地平線相差不足五度，加上天未全黑，可能要比較費力先搵得到月球嘅位置。不過天文台預料當日天晴，有利市民觀賞月偏食！

網上直播連結

出門「追月」唔簡單，香港太空館、天文台等亦推出「月偏食網上聯合直播」，留喺屋企都睇到月偏食！網上直播將於2021年11月19日（星期五）17:38前開始（按此看）。

今次月偏食將係2021年最後一次月食，錯過咗就要等到2022年11月8號出現嘅月全食先再有得睇喇！

資料來源：香港太空館、香港天文台

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）