COLLAR成員素顏大公開！Day獲激讚可愛/So Ching被指勁似師兄Jeremy
1. Marf素顏年齡大減！
作為《全民造星4》冠軍，Marf（邱彥筒）雖然年僅19歲，但喺節目中佢處事、形象都非常成熟。加上眉上齊蔭同濃艷妝容，畀人一種大姐姐感覺。
Marf嘅個人IG甚少公開素顏照，不過佢喺《全民造星4》海選現場妝容就相對簡單，有畫眉同眼線，但眼妝淡好多，睇落即時更貼近佢真實年齡～
2. Gao素顏變鄰家女孩
COLLAR隊長Gao（沈貞巧）向來有「女版Lokman」之稱，佢喺舞台上有十足活力，決賽上Gao嘅造型令人留下深刻印象。
喺B組排練時Gao多次以素顏現身，佢同妝後比較變化唔大，素顏嘅佢有一種鄰家女孩feel～但亦有網友直言佢素顏大跌watt！
3. Day青春無敵，素顏無分別？
季軍Day（許軼）同樣只有19歲，正所謂「青春就係本錢」，Day雖然有包包面，但都獲fans激讚可愛！
阿Day素顏幾乎同妝後無咩分別，嘴唇顏色自然，有網友公開佢嘅學生照，完全係青春無敵，連登網友投友票中Day更獲最高票數成COLLAR成員「素顏評分第一名」
4. 35歲芯駖比幾年前素顏更年輕
芯駖（李芯駖）以35歲之齡作為女團成員出道引起網民熱議，有網友認為佢年紀偏大，拉高咗COLLAR平均年齡，但芯駖保養得宜，更因而獲封「女人天花板」。
擁有成熟女人味嘅芯駖已獲視為凍齡界代表人物，佢2016年曾公開一張素顏照：「素顏看日出」，唔少網民睇完後直言依家嘅芯駖睇落比當時30歲時更加後生。
5. So Ching素顏被指似師兄MIRROR Jeremy
作為團入面嘅「舞蹈擔當」，So Ching（蘇芷晴）喺舞台上一向都充滿魅力。喺節目中更發掘出佢歌唱實力，以「T7」一員表演《Look at how you look at me》佢仲唱埋高音，實力備受認可。
最近佢喺IG公開化妝前嘅素顏照，So Ching即使唔化妝眼睛都仍然勁大！有網友搵返佢2016年公開嘅舊照，指佢同師兄MIRROR成員Jeremy好似！
6. Ivy So素顏變可愛？
Ivy So（蘇雅琳）參加節目後就獲指係「顏值擔當」，佢亦接咗唔少護膚品、化妝品廣告，眼睛係Ivy So魅力點之一。
佢IG於2019年曾公開過校服照，當時戴住眼鏡嘅Ivy So眼睛明顯不及妝後精靈，不過笑容燦爛，充滿青春活力，與妝後成熟美大為不同。
7. Candy年紀最細，素顏皮膚勁好
比Day仲細半年嘅Candy（王家睛）同樣喺參賽初期就因為靚樣獲封大熱。當時因為實力不足問題曾被花姐質疑，佢亦表示：「我都睇唔起靠樣入圍嘅人」，但之後佢一次又一次進步，最終更成功入團！
作為全團年紀最細嘅成員，Candy素顏狀態超好！即使簡單紮馬尾，不施脂粉，Candy仍獲網友大讚「好有仙氣」！
8. Winka獲網友大讚唔化妝更靚
Winka（陳泳伽）喺團內係主唱，不過剪咗短髮嘅佢就被網友直指「造型出晒事」，更有人問造型師係咪整蠱佢。其實Winka長髮都唔錯，佢亦表示以後會嘗試更多唔同嘅look。
Winka曾經多次喺《全民造星4》節目以素顏示人，網友勁讚佢素顏仲靚過化妝，更直言唔好再剪短頭髮，表示Winka長髮好睇好多。
網友投票，Day大比數勝出「Collar成員素顏評分投票」
連登討論區有網友以「Collar成員素顏評分投票」為題發文，當中Day以超過4,000票位列第一，Winka以近3,000票成為第二位，Candy排第三緊隨其後。不過有網民質疑樓主唔識分「素顏」，將部分成員明顯化咗妝嘅相放上去當素顏供他人投票。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
COLLAR被指抄韓團？！LOGO/海報設計/出道歌/MV都超似？ViuTV或組第二個女團
13 Jan 2022
ViuTV《全民造星4》選出嘅女團「COLLAR」終於正式出道！不過女團宣佈出道後僅幾個小時已有網民喺討論區指COLLAR疑似抄韓團，包括LOGO/海報設計/出道歌都十分相似，直指ViuTV早有前科！
ViuTV女團「COLLAR」被網友指抄韓團？
ViuTV首推女團「COLLAR」，喺出道舞台上公開8位成員：Marf、Gao、Day、芯駖、So Ching、Ivy So、Candy、Winka。佢哋更表演出道曲《Call My Name》。
喺出道舞台公開後，有網友喺連登討論區發文「香港第一女團COLLAR疑似抄襲？」，樓主post出COLLAR嘅一張poster，表示同韓國男團NCT十分相似。
宣傳poster與多個團體相似？
另一張poster亦被指似EXO，之後網民更公開唔少相似嘅設計圖，包括《永恆族》、BEYOND，甚至連廿四味（24herbs）都有一張類似嘅poster。
有網民反駁指紅底背景加上「高炒」角度根本好常見，話係抄就非常勉強。但有疑似係做攝影行業嘅網民就稱：「成個佈置包括人物擺位影子方向、拍攝角度同表情都70%似只係改咗少少」
COLLAR LOGO被指似超人！網友指出道曲《Call My Name》似EXO嘅歌
除咗poster之外，有網友指COLLAR嘅LOGO同Superman好相似，而出道曲《Call My Name》亦不能幸免，分別被指同AKB48嘅《River》、EXO《Drop That》好似。
MV預告公開，又被指參考咗韓國女團aespa
至於MV雖然仲未公開，但網友憑預告嘅片段就指COLLAR嘅造型同MV佈景都好似韓國女團aespa，直言：「唔講以為係同一個MV！」，但亦有唔少網民認為MV元素、曲風都好常見，根本唔構成抄襲。
有網友提到ViuTV早有前科，《全民造星4》嘅intro同英雄聯盟嘅「女團」KDA新曲《More》非常相似，網友表示：「模板同啲色少少都唔轉下」
《全民造星4》intro：
英雄聯盟「女團」KDA《More》MV：
ViuTV或推第二個女團，Ash、Sica有份？
女團COLLAR一出道即備受關注，有細心網友發現ViuTV似乎有意推出第二個女團，因為《全民造星4》另外6位參賽者嘅IG個人簡介有所更新，直接指出已簽約ViuTV！
當中包括Sica、Alice、Yoyo、Win Win、超酸，仲有近日成網民話題中心人物Ash都有份！有網友猜測ViuTV可能會好似MIRROR、ERROR咁，再同時推兩個女團。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
