九巴報站機Error爆笑合集 灣仔消防娃 東隧去西隧 網民：IT玩嘢？

九巴係唔少香港人嘅常用交通工具，路線多元、四通八達，車上嘅報站系統對乘客非常重要。不過，近日有網民到討論區分享多張九巴報站機出現錯誤嘅圖片，仲錯得非常搞笑，例如「香港真兇書院」、「九巴轉乘最劣」等，相當離奇爆笑，更有網民嘗試解釋出現Error嘅原因！

「香港真兇書院」見到唔敢落車？

最近，有網民到連登討論區以「嚴選最有創意嘅九巴報站機Error」為題發文，直接貼出一張出錯嘅九巴報站機畫面，上面寫上：「本站：香港真兇書院」，相信本來想指「香港真光書院」，好彩呢家唔係農曆七月，否則真係唔敢落車！

除咗恐怖書院，仲有應該想指饒宗頤文化館嘅「饒宗頤血化館」、及想指福來邨嘅「瘋來邨」。不少網民都留言表示好恐怖「變咗恐怖片」、「如果夜媽媽搭，見到呢個字你都咪話唔驚。」

九唔搭八路線

亦有報站機顯示，竟然有連續兩個站跨越兩條隧道，分別有「東區海底隧道 到 西區海底隧道」、「西區海底隧道 到 紅磡海底隧道 到 屯門公路轉車站」。對此，有網民笑言「呢條線都幾兜」、「睇見都覺得塞」、「成個港九新界佢行曬」。

九巴報站機識自嘲？！

除咗show啲出其不意嘅路線，九巴報站機更疑似展現出批判性思考。一幅圖片顯示某部上層報站機螢幕顯示「九巴轉乘最劣」，亦有另一部機寫著「本站：歡迎乘坐九瀏巴士」。網民見到都笑言「九巴自己知自己事」、「九巴IT玩嘢？」、「九瀏巴士 = 九流巴士？」

巴士仔發惡？！

除咗報站機疑似展現人性，連九巴吉祥物「巴士仔」都好似識誇維度透過報站機同乘客溝通！但佢好似不懷善意，螢幕顯示「巴士仔__你」，有網民驚訝留言：「巴士仔小X你？」

網民解釋Error原因

見到咁多爆笑Error，大家都好奇點解會錯成咁，問道：「（車站資料）唔係一早入定㗎咩？」、「有啲字拼音又唔係似，倉頡又唔係，都唔明點解會打錯。」對此，有網民出面解釋：「Transmission error，System寫得差無checksum，好似以big5 code為例，『0xBAC6=瘋』、『0xBAD6=福』。」

其他搞怪報站機Error！

除咗以上恐怖又搞笑嘅車站，其他網民亦分享了不少亂碼與錯字車站，效果笑爆嘴，以下立即睇睇！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）