打工仔犯錯被公司雪藏後無嘢做悶到患心理病上庭索償$320萬！

By Cheryl on 25 Jan 2022

Digital Editor

好多打工仔嫌工作太chur，導致身心出現問題，但法國一名男子卻嫌返工太得閒，更因此承受極大心理毛病，其後不幸出車禍，休養半年後被公司炒，男子向公司索償獲得受理，引起國際熱話。

Photo from TVB

法國打工仔失大客後被「雪藏」

綜合外媒報道，法國一名男子Frederic Desnard昔日在當地一間香水公司擔任經理，年薪大概8萬美元（約62萬港元），即月薪約5.1萬港元。直到2010年，佢因為令公司損失一名大客而被公司投閒置散，從此只獲安排做簡單工作，例如採購紙張，令佢每日嘅真正工作時間只有20至40分鐘。

Photo from Frederic Desnard

被投閒置散感痛苦

工作量大減嘅Frederic未有因此開心，佢反而對人生失去動力，佢為自己白白領取人工感到羞愧，每日喺公司都覺得自己係透明人，「每日除咗上網，就只能空虛地在辦公室裡哭泣。」佢更形容自己感覺就好似墮入地獄般痛苦。

Photo from YouTube截圖

請長病假後被公司解僱

Frederic後來更在一次駕車途中癲癇發作，發生車禍。佢求醫時，醫生同時診斷佢嘅精神問題可能同乏味工作有關。Frederic為此請假7個月以作休養。但長期缺席亦令公司不滿，到2014年，公司以「長期缺勤」和「干擾公司運作」為由解僱Frederic。

Photo from YouTube截圖

起訴公司，獲賠超過30萬港元

Frederic於是起訴前公司，理由為不正當解僱及導致自己有精神問題，佢嘅律師強調，上班被打入冷宮同健康狀況惡化有一定關係。而公司一方則反駁，Frederic被「雪藏」嘅4年間從未表達過對工作嘅不滿。

Photo from YouTube截圖

最後，法庭認為令員工「過度無聊」都算係一種精神壓逼，認為Frederic有承受一定程度傷害，所以判公司一方需向Frederic賠償4萬歐羅（約35.5萬）港元。不過，Frederic認為自己受到嘅傷害未止於此，所以佢再向勞資關係法院提出訴訟，進一步要求公司賠償320萬港元，但最終被法庭推翻，法官維持原判。