《鐵達尼號》塵封50年愛情故事曝光！駐唱女歌手愛上富二代！結局超催淚

By Stephanie on 10 Feb 2022

Digital Content Writer

經典電影《鐵達尼號》（Titanic）改編自真實事件，而電影中Jack同Rose嘅經歷令人動容，成為唔少人心中刻骨銘心嘅愛情故事。不過原來呢個故事係真實咁存在㗎，有當年嘅生還者表示同男友一齊坐上鐵達尼號，但亦因此而天人永隔！唔少人初初都唔相信呢位女士所講嘅經歷，直到事隔50年先發現呢段愛情故事係真實嘅！

Photo from 《Titanic》

# 《鐵達尼號》愛情故事真實存在？！

相信唔少人都應該有睇過電影《鐵達尼號》（Titanic），當中Jack同Rose呢對戀人嘅故事，令唔少觀眾都睇到熱淚盈眶！然而，喺電影中出現嘅情節係真有其事，而且呢段故事仲事隔50幾年先得以證實。

Photo from 《Titanic》

# 事故發生於1912年，被稱為「最嚴重船難」！

根據媒體報導，「鐵達尼號沈沒事故」發生喺1912年嘅4月14日，由於船隻意外撞上冰山，導致船身出現裂縫開始沈沒！但係救生艇嘅數目並唔足夠，加上船隻沈沒速度快，令唔少在船上嘅人都未能逃離。據悉，船隻沈沒嘅時候船上依然有大約1,500人，大部分人都因為掉落海中失溫而離世，堪稱「史上最嚴重船難」！

Photo from 《Titanic》

# 生還者分享自身經歷！

而成功從鐵達尼號中被救回嘅人就有大約710人，當中來自德國嘅Berthe Antonine Mayné就係其中一位生還者，當男友卻喺沈船後音訊全無！Mayné原先係一位比利時酒店嘅駐唱歌手，夢想將來能夠成為一位明星！喺1911年，佢遇見來自加拿大嘅曲棍球選手Quigg Edmond Baxter，兩人一見鍾情，但因為佢哋嘅家庭背景相差太遠導致唔能夠光明正大談戀愛！

Photo from Twitter

# 二人因背景差異，需要偷偷約會！

正當兩人處於熱戀階段時，男方就被告知要同家人一齊搭乘「鐵達尼號」回家。最終，男方為Mayné買下船票，並將佢嘅名字改為「Mrs de Villiers」藉此掩人耳目。鐵達尼號啟航後，二人經常都於甲板上約會，渡過咗非常甜蜜嘅時光～

Photo from 《Titanic》

# Baxter為家人以及女友尋獲救生艇，但自己卻拒絕登上！

好景不常！直到啟航嘅第5日，Baxter率先發現船隻停止行駛，所以就尋找船長詢問。後來得知事態嚴重，就立刻帶同媽媽、妹妹、Mayné登上6號救生艇，但自己就拒絕上船！初時，Mayné見狀就立刻拉住男友嘅手盼望留下來陪佢，但最終都因為旁人嘅勸告而登上救生艇。之後，Baxter就隨住船隻沈沒，再無音訊！

Photo from Twitter

# Baxter失去消息，而Mayné就終生不嫁！

Mayné喺意外發生後，多次嘗試尋找Baxter不果，最終到法國巴黎繼續擔任駐唱歌手，但就因為未能忘記一生摯愛而未有結婚！佢曾多次於親友分享呢段愛情經歷，但由於當時買船票嘅時候並非用佢本名，導致連家人都對佢所講嘅話半信半疑。Mayné帶著遺憾於1962年與世長辭，而姪子喺翻找遺物時尋獲當年同Baxter嘅情書等，先令佢哋埋藏多年嘅戀情曝光，令唔少網民對二人堅定不移嘅愛情感到不捨！