網民投選TVB15大「派膠」劇情!無厘頭+離地情節令人爆笑!超簡陋CG似兒童節目?

網民投選TVB15大「派膠」劇情!無厘頭+離地情節令人爆笑!超簡陋CG似兒童節目?

電視電影 娛樂新聞
By Stephanie on 18 Mar 2022
Digital Content Writer

TVB過往都曾經製作過唔少經典電視劇,當中唔少都能夠喚起大家嘅回憶!其中TVB部份嘅劇集就有十分離奇嘅劇情場面,超乎現實嘅想像,令網民都爆笑咁話「真係好膠!」最近,有網民於喺連登討論區開post掀起熱議,即睇網民提及嘅15個TVB劇集「派膠」場面啦~

網民於討論區選出TVB歷來最膠劇情,當中唔少情節都令大家笑爆嘴~Photo from ViuTV

1. 《黃金有罪》姚子羚撞車

劇中姚子羚不小心出意外被車撞到,反彈力似乎非常勁,令佢成個人凌空拋起!但唔少網民就爆笑話場面太假,「表哥睇落咁平靜,似瞓咗覺多啲」!

姚子羚於劇中發生交通意外,於空中凌空嘅畫面,被網民指好假!Photo from 《黃金有罪》

2. 《無雙譜》「追魚」

《無雙譜》係一套由3個獨立神話故事組合而成嘅劇集,當中《追魚》係其中一個故事。故事大致講述有關海裡面嘅神話故事,然而強差人意嘅電腦後製,令劇情一秒變成搞笑片!

呢個電腦特效真係令人睇得好尷尬!Photo from 《無雙譜》

唔知點解有少少似兒童節目~Photo from 《無雙譜》

一去到拍海底嘅場面就變成搞笑片!Photo from 《無雙譜》

3. 《掌上明珠》飛天輪椅

劇情講述二人一同被困火場,眼看坐喺輪椅上嘅宣萱已經快昏迷、半癱嘅陶大宇都危在旦夕。突然,陶大宇化身「輪椅俠」用繩將成架輪椅飛出去,成功將宣萱救出!

呢幕非常經典,陶大宇亦因此而被稱為「輪椅俠」!Photo from 連登討論區

當時仲係童星嘅譚真一表示可以自己去洗手間,然而佢其實並唔夠高......令網民都睇都替佢感到焦急!

譚真一打算去洗手間,但卻發現原來唔夠高!Photo from 《黃金有罪》

4. 《潮拜武當》微波爐叮蕃薯

飾演失憶人士嘅郭政鴻模糊咁將幾個蕃薯擺入微波爐叮,導致過熱而爆蕃薯,仲俾蕃薯炸到退後幾尺遠!

郭政鴻叮蕃薯一幕非常經典!Photo from 《潮拜武當》

俾大家第一身視角感受下~Photo from 《潮拜武當》

5. 《神鎗狙擊》 謝天華單手爬山

相信唔少人都對呢一幕十分印象深刻~謝天華本身正在攀岩,突然收到來電嘅佢居然選擇單手聽電話停留喺崖邊,強勁嘅體力令人驚嘆!

謝天華本身專心攀岩中Photo from 《神鎗狙擊》

而謝天華居然選擇要單手接電話攀岩!Photo from 《神鎗狙擊》

6. 《叛逃》極限訓練

當時飾演導師嘅關禮傑正帶領學員們進行跨樓跳躍特訓,仲率先大膽試跳,危險程度滿分!而學生們緊隨其後,跟住一齊跳,仲不停擺動雙手,唔知係咪可以加快到達對面樓嘅速度呢?!

扮演導師嘅關禮傑向學生們展示跨樓跳躍!Photo from 《叛逃》

唔知跳嘅時候雙臂一齊擺動係咪會快點啲到岸?!Photo from 《叛逃》

7. 《戀愛自由式》游水招式超誇張

經典偶像劇《戀愛自由式》係唔少網民心目中嘅童年回憶~劇中有4大經典招式:破冰轉身、片石轉身、繞流泳法以及磁浮泳法,非常有氣勢;有網民就表示「好細個嗰陣以為真係有呢啲招」!

一個轉身踩牆,仲可以飛出水面!Photo from 《戀愛自由式》

唐寧當時苦練好耐先練成嘅「片石轉身」!Photo from 《戀愛自由式》

8. 《溏心風暴》夏雨暈倒抽搐演技

經典電視劇《溏心風暴》中「Jo鮑」夏雨唔小心跌倒撞到頭,不過送院後佢暈倒抽搐嘅畫面,令網民忍唔住笑咗出聲!

當時係咪有地震?!Photo from 連登討論區

9. 《強劍》龜波氣功

鄭嘉穎同黃宗澤當時一齊使用「龜波氣功」對付敵人,配合雙手嘅動作以及特效,非常有卡通感覺~

施展龜波氣功之前,一定要有架勢!Photo from 連登討論區

合力對抗敵人,好有睇緊真人版卡通嘅感覺!Photo from 《強劍》

10. 《桌球天王》

劇中嘅所有桌球技巧都神乎其技,包括:鄭少秋一下用手臂接住三個桌球、「倚天Cue」、「屠龍Cue」等,完全同正常嘅桌球有好大分別!

一支桌球棍居然可以接波?!Photo from 連登討論區

用神力打桌球Photo from 連登討論區

手臂就可以接住3個波!Photo from 連登討論區

11. 《跨世代》飲管醫氣胸

洪永城劇中被打受傷休克,仲出現氣胸問題;擁有從醫經驗嘅譚凱琪即使喺垃圾堆裡面搵到吸管幫佢急救?!而且後期嘅CG技巧都好假,令網民直斥超離地!

用吸管醫治氣胸,大家又有冇見過呢?!Photo from 《跨世代》

後期特效仲好假Photo from 《跨世代》

12. 《隔世追兇》石修神奇催眠術

當時石修被壞人追趕,臨急關頭佢只好利用佢獨特嘅催眠技巧,成功拯救返自己!

只需要望住想催眠嘅對象,在講出台詞就可以了!Photo from 連登討論區

13. 《潛行狙擊》徐子珊擁有主角光環

大結局中,徐子珊被黃宗澤擊中心臟位置,但卻竟然意外生還,原因係劇中設定嘅佢心臟生於右邊。然而,劇中佢多次深陷險境但都離奇生存,令網民覺得劇情極不合理!

徐子珊多次陷入險境都能夠意外生還!Photo from 《潛行追擊》

目擊爆炸場面都完好無缺!Photo from 《潛行追擊》

14. 《飛虎2》

扮演警察嘅梁競徽利用透過番梘泡倒影尋找敵人位置,成功擊中對方;而袁偉豪喺拆計時炸彈嘅時候,觀眾發現真身其實係倒計時器?!輕輕撳粒掣就立刻解除危險。

梁競徽劇中觀察力非常厲害!Photo from 《飛虎2》

廣告
廣告

用泡泡就搵到敵人藏身位置!Photo from 《飛虎2》

就連拆彈都只係撳掣就搞掂~Photo from 《飛虎2》

15. 《大冬瓜》

2009年《大冬瓜》被網民評為TVB經典膠劇,就連已故嘅「智叔」廖啟智都拯救唔到呢套劇!當中就用咗「范統」、「屈基」等食字嘅詞語作為角色名稱;仲模仿卡通《寵物小精靈》,冬瓜就代表精靈球等。劇情超級奇怪,令唔少網民都話成套劇都似兒童節目!

《大冬瓜》被網民選為一定榮登膠劇三甲嘅劇集!Photo from 《大冬瓜》

當中劇情仲模仿《寵物小精靈》!Photo from 《大冬瓜》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

「TVB史上最低收視10大劇集」掀熱議!C9特工、大步走、金枝慾孽貳

2 Feb , 2022

近年TVB落力大搞改革,更於2021年邀請曾志偉王祖藍回巢出任管理層,不過近日連登討論區有網民统計咗TVB史上最低收視10大劇集,發現近半都係呢兩年播出嘅劇集,而且全部收視都唔過21點,最低甚至得14點。

近年TVB落力大搞改革,更於2021年邀請曾志偉、王祖藍回巢出任管理層Photo from TVB

王祖藍現為TVB「首席創意官」Photo from 王祖藍微博

第十位:《堅離地愛堅離地》

張振朗、龔嘉欣、劉佩玥主演嘅《堅離地愛堅離地》於2020年尾至2021年年初播出,係一套時裝愛情科幻喜劇。本來早已喺2017年拍攝完畢,但因為「安心事件」令劇集需要過幾年先可以播出,平均收視為20.9點。

張振朗、龔嘉欣、劉佩玥主演嘅《堅離地愛堅離地》於2020年尾至2021年年初播出Photo from TVB

第九位:《C9特工》

《C9特工》於2020年播出,由高海寧、馬國明及黎諾懿領銜主演,平均收視為20.8點。

《C9特工》於2020年播出,由高海寧、馬國明及黎諾懿領銜主演Photo from TVB

第八位:《來自喵喵星的妳》

《來自喵喵星的妳》係2016年播出,更係當年嘅台慶劇,由田蕊妮、胡定欣、陳豪主演,角色設定同《鬼同你OT》相似,不過收視就差好遠。《鬼同你OT》全劇平均收視為29點,而《來自喵喵星的妳》只得20.8點,結局周亦得21點。

《來自喵喵星的妳》係2016年播出,更係當年嘅台慶劇,由田蕊妮、胡定欣、陳豪主演Photo from TVB

第七位:《金枝慾孽貳》

《金枝慾孽貳》係10套最低收視劇集中最舊嘅一套劇,於2013年播出,蔡少芬、鄧萃雯、伍詠薇、陳豪等主演,劇集係前作《金枝慾孽》播畢近九年後才播出。當年《金枝慾孽》獲封「神劇」,收視更高達40點,但《金枝慾孽貳》雖然都係由戚其義做監製,但平均收視僅為20.6點。

《金枝慾孽貳》於2013年播出,蔡少芬、鄧萃雯、伍詠薇、陳豪等主演Photo from TVB

當年《金枝慾孽》獲封「神劇」,收視更高達40點Photo from TVB

第六位:《丫鬟大聯盟》

洪永城、湯洛雯主演嘅《丫鬟大聯盟》於2020年尾至2021年年初播出,黃心穎都係主演之一,佢同湯洛雯同為劇集女主角。劇集平均收視為20.4點。

洪永城、湯洛雯主演嘅《丫鬟大聯盟》於2020年尾至2021年年初播出,黃心穎都係主演之一Photo from TVB

第五位:《我瞞結婚了》

洪永城、黃翠如一直都係好朋友,佢哋更多次表示大家好有默契好了解對方,亦合作過唔少旅遊節目,不過佢哋主演嘅《我瞞結婚了》成績麻麻,劇集於2017年播出,平均收視為20點。

洪永城、黃翠主演嘅《我瞞結婚了》成績麻麻,劇集於2017年播出,平均收視為20點。Photo from TVB

第四位:《巾幗梟雄之諜血長天》

《巾幗梟雄》系列可謂TVB嘅經典劇集,前兩套都有極佳嘅收視同口碑。作為姊妹作,《巾幗梟雄之諜血長天》無咗靈魂人物鄧萃雯,改為由黎耀祥、胡杏兒主演,喺2013年已拍攝完畢,但要到2016年年尾先播映,收視亦十分慘淡,平均只有20點。

《巾幗梟雄》系列可謂TVB嘅經典劇集,前兩套都有極佳嘅收視同口碑Photo from TVB

《巾幗梟雄之諜血長天》無咗靈魂人物鄧萃雯Photo from TVB

《巾幗梟雄之諜血長天》由黎耀祥、胡杏兒主演Photo from TVB

第三位:《大步走》

《大步走》於2021年播出,劇集以跑步為題,帶出「斷捨離」主題,由陳山聰、姚子羚、劉穎鏇及張達倫主演,平均收視為19.3點。

《大步走》於2021年播出,劇集以跑步為題,帶出「斷捨離」主題,由陳山聰、姚子羚、劉穎鏇及張達倫主演Photo from TVB

第二位:《蘭花刼》

《蘭花刼》由蘇玉華、田蕊妮、唐寧、陳錦鴻主演,係一套民初劇。劇集於2017年播出,但其實係喺2006年拍攝,事隔11年先喺黃金時段播映,當時已係高清世代,劇集仍以標清質素播出,可謂真正「倉底劇」,平均收視只有18點。

《蘭花刼》由蘇玉華、田蕊妮、唐寧、陳錦鴻主演,係一套民初劇。Photo from TVB

第一位:《刑偵日記》

《刑偵日記》於2021年播出,其實劇集演員陣容強勁,有影后惠英紅、視帝王浩信、金像獎「最佳男配角」姜皓文,但收視比上述所有劇集都要低,平均收視得13.77點!由播出起每星期收視都下跌,到結局周更跌至10.2點。

《刑偵日記》於2021年播出,其實劇集演員陣容強勁,有影后惠英紅、視帝王浩信、金像獎「最佳男配角」姜皓文Photo from TVB

《刑偵日記》平均收視得13.77點!由播出起每星期收視都下跌,到結局周更跌至10.2點。Photo from 《刑偵日記》微博

當時ViuTV同時段播出《大叔的愛》,《大叔的愛》口碑、話題度都爆燈,唔知係咪受到影響,《刑偵日記》創下TVB開台台54年嚟最低收視,有指劇集成績唔理想更令董事局主席許濤決定引入團隊審批電視劇劇本。

當時ViuTV同時段播出《大叔的愛》,《大叔的愛》口碑、話題度都爆燈Photo from ViuTV

《刑偵日記》創下TVB開台台54年嚟最低收視,有指劇集成績唔理想更令董事局主席許濤決定引入團隊審批電視劇劇本。Photo from TVB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel