陳庭欣與男友到泰國高調大晒恩愛!傳二人好事近!男方曾送贈物業做禮物?

陳庭欣與男友到泰國高調大晒恩愛!傳二人好事近!男方曾送贈物業做禮物?

娛樂新聞
By Stephanie on 01 Sep 2022
Digital Content Writer

2010年港姐冠軍陳庭欣(Toby)與彩豐行老闆楊振源相戀多年,不時都會喺IG公開放閃。最近,佢同男友泰國布吉島旅遊,並上載多張旅行照片,睇得出二人嘅感情越來越穩定!隨住佢哋放閃嘅頻率越來越高,唔少網民都猜測佢哋係咪即將結婚好事近呢?!

陳庭欣同彩豐行老闆楊振源飛往泰國布吉島度假~Photo from 陳庭欣IG

陳庭欣2018年與彩豐行老闆交往!

陳庭欣(Toby)喺2018年被爆與擁有10億身家嘅彩豐行老闆楊振源熱戀中,當時佢向媒體表示二人正處於互相了解嘅階段。同年8月,佢喺IG首度上載情侶照,sweet爆寫上「人生中第一次放閃」正式向大眾公開戀情!2019年男友投資$1,200萬開健身房,仲搵咗陳庭欣做代言人,情侶檔一齊搵真銀~

2018年陳庭欣喺IG上載情侶照,公開戀情!Photo from 陳庭欣IG

二人感情穩定,2019年男方投資1200萬開健身房,仲邀請陳庭欣做代言人~Photo from 陳庭欣IG

與男友到泰國旅遊

日前,陳庭欣同男友飛往泰國布吉島,順便慶祝埋女方嘅35歲生日;而佢亦喺IG上載咗一系列嘅旅遊打卡照,同男友一齊做瑜珈、冥想、食燭光晚餐等,享受悠閒假期「完成第1️⃣站Phuket😊😉」,似乎仲會繼續二人世界!正值夏天就當然唔少得出去游水啦,陳庭欣大晒fit爆泳裝照,狀態似乎非常好~

陳庭欣最近同男友一齊飛往泰國布吉島旅遊!Photo from 陳庭欣IG

仲一齊去游水~Photo from 陳庭欣IG

過往曾透露有結婚計畫

二人近年公開放閃嘅頻率越來越高,令外界不斷傳出二人即將結婚嘅傳聞。2019年,陳庭欣曾透露計畫2年後同男友結婚,仲話雙方都已經見過家長,早已視彼此為結婚對象。睇嚟結婚都只係遲早嘅事喇~

陳庭欣喺2109年嘅時候透露二人將於2年後結婚?!Photo from 陳庭欣IG

即睇更多人氣文章:

與男友交往後 搬入豪宅居住!

據悉,本身與父母同住九龍灣啟晴邨嘅陳庭欣喺同男友交往後,居住環境都「升呢」咗!2020年,佢就以月租$10萬搬咗入九肚山嘅3,000呎豪宅居住,有4間房、車庫以及花園露台,非常豪華~

2020年陳庭欣搬入位於九肚山嘅3千呎豪宅,盛傳月租高達$10萬!Photo from 陳庭欣IG

豪宅內空間好大,而陳庭欣都養咗好多寵物~Photo from 陳庭欣IG

男友曾多次與女藝人傳緋聞?!

雖然陳庭欣同男友楊振源已經公開戀愛多年,但男友嘅桃花緣依然超旺,曾與多位女星傳出緋聞,有傳男友為咗哄返女方而送上價值逾千萬嘅黃大仙現崇山單位。不過陳庭欣過往亦經常為男友解畫,指自己非常信任男友!

男友楊振源嘅異性緣極好,同陳庭欣交往後都多次傳出緋聞!Photo from 陳庭欣IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

港姐陳庭欣公開月租十萬九肚山豪宅!由公屋港姐變貴婦 生活越來越富貴

3 Sep , 2021

2010年港姐冠軍陳庭欣(Toby)自從同坐擁10億身家嘅楊振源(Benny)拍拖之後,生活就變得越來越富貴!近日就係陳庭欣嘅34歲生日,而佢就上載咗唔少朋友同男友為佢慶祝生日嘅照片,仲公開咗豪宅內嘅環境!

廣告
廣告

陳庭欣被指生活越來越富貴?!Photo from 陳庭欣IG

#入行後做主持人居多

陳庭欣(Toby)於2010年參選香港小姐獲得冠軍而入行,有份出演電視劇以及主持節目,曝光率都算高。除咗事業順遂之外,佢嘅感情生活都非常多姿多彩。入行後,佢曾經同翟威廉交往5年,不過兩人最終分手收場,但就聲稱兩人變成「Best friend」!

早前有份主持東京奧運Photo from 陳庭欣IG

#公開戀情!

2018年,陳庭欣被傳媒大爆與彩豐行老闆楊振源(Benny)嘅戀情,後來佢就於IG上載兩人嘅合照正式公開戀情!據悉,作為大老闆嘅楊振源坐擁$10億身家,曾經大手筆投資$1200萬開健身中心,仲邀請女友親自做代言人,一齊搵錢,並揚言兩人預計於今年結婚。

同男友楊振源(Benny)交往多年!Photo from 陳庭欣IG

男友身家逾$10億Photo from 陳庭欣IG

#豪宅內部曝光

日前,陳庭欣就上載咗好姐妹為佢慶祝生日嘅照片,而照片就曝光咗佢現時居住嘅豪宅內部!據悉,本身與父母同住於九龍灣啟晴邨嘅陳庭欣自從同男友一齊之後,生活變得越來越富貴,仲搬入位於沙田九肚山月租10萬嘅澐灃洋房:面積足足有3,000多平方呎,有4間房同車庫;另設有400平方呎嘅花園以及超過630平方呎嘅天台,十分豪華~

迎來34歲生日!Photo from 陳庭欣IG

由陳庭欣嘅生日照片所見,佢嘅豪宅設計風格主要都係以簡約為主,而飯廳就擺放咗一張大理石嘅圓形餐桌,就算邀請一大班人去屋企開party都唔需要擔心唔夠位置啊!而飯廳嘅後方就有一條樓梯,豪宅空間十分之大~

飯廳放咗張好大嘅餐桌 開party都唔洗擔心!Photo from 陳庭欣IG

豪宅內仲有樓梯!Photo from 陳庭欣IG

#屋內空間大

而平日入得廚房出得廳堂嘅佢亦喺生日當天大顯身手,廚房嘅牆身都係大理石紋理,令整體環境睇落更加乾淨典雅,睇得出廚房嘅設備亦非常齊全,相信佢平時一定有下廚嘅習慣喇!客廳嘅位置亦十分寬敞,即使同朋友玩遊戲大合照都有好多空間~

平時熱愛下廚嘅佢生日都為來賓炮製料理!Photo from 陳庭欣IG

即使邀請好多人開party都唔驚冇位~Photo from 陳庭欣IG

客廳以白色為主色Photo from YouTube@「Animore TV 動物踩過界」

陳庭欣曾經喺自己嘅Youtube Channel「Animore TV 動物踩過界」中曝光浴室嘅設計,並主要以白色為主,睇落非常簡潔,就算幫狗狗沖涼都絕對冇問題啊!

浴室設計以簡約為主Photo from YouTube@「Animore TV 動物踩過界」

就算同狗狗沖涼 空間都十分足夠!Photo from YouTube@「Animore TV 動物踩過界」

#天台景觀開揚

另外,影片中亦都公開咗天台嘅位置,望出去就可以望見清幽嘅山景,而且加上豪宅本身位於較高嘅地方,令佢可以俯視周邊嘅景色!而天台嘅面積亦好大,有好多空間俾狗狗跑步同玩耍。

附近環境清幽 非常寫意~Photo from YouTube@「Animore TV 動物踩過界」

露台環境非常大!Photo from YouTube@「Animore TV 動物踩過界」

#傳男友送贈單位?!

陳庭欣同男友交往期間,男方不時都被傳媒爆出同其他女生有曖昧關係,有傳男友楊振源就送咗位於黃大仙現崇山價值逾千萬嘅單位哄陳庭欣。不過對於傳聞,陳庭欣就表示絕對信任男友。睇嚟兩人嘅關係非常穩定,唔知會唔會好事近呢?!

有傳男友送陳庭欣一個單位?!Photo from 陳庭欣IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel