download HolidaySmart 假期日常 app
劉愷威出演內地中秋晚會,獲網民大讚靚仔!回顧入行後樣貌變化史!曾公開回應整容傳聞

劉愷威出演內地中秋晚會,獲網民大讚靚仔!回顧入行後樣貌變化史!曾公開回應整容傳聞

娛樂新聞
By Stephanie on 11 Sep 2022
Digital Content Writer

劉愷威於2005年離巢並將事業重心轉往內地,事業發展順利,喺當地人氣都幾高。近日,佢有份出演真人騷《披荊斬棘的哥哥2》雖然並未有引起話題,但唔少網民都大讚佢樣貌越來越標緻;過往亦曾陷入整容疑雲?!

劉愷威嘅樣貌被內地網民大讚精緻咗?!Photo from 《披荊斬棘的哥哥2》微博

劉愷威2005年後北上發展

47歲劉愷威過往大台藝人,後來喺2005年離巢往內地發展,稱得上係首批北上發展嘅香港藝人。隨後佢憑《千山暮雪》、《美人無淚》等作品躍升成為一線男星,人氣不俗!

劉愷威2005年離巢後就北上發展!Photo from 劉愷威微博

獲邀於中秋晚會獻唱

昨日,劉愷威登上央視舉辦嘅《中秋晚會2022》,與澳門藝人麥嘉欣(Sofia)合唱《小城是故鄉》。只見舞台上佈滿唔同嘅綠色樹木作為背景,而劉愷威則身穿藍色西裝,一臉陶醉咁獻唱~

劉愷威出演央視舉辦嘅《中秋晚會2022》Photo from 《中秋晚會2022》

與澳門女藝人麥嘉欣(Sofia)合唱Photo from 《中秋晚會2022》

獲內地網民大讚靚仔!

期間鏡頭多次近鏡咁影向劉愷威,唔少內地網民都大讚佢狀態大勇,極力誇讚「好有型!」、「認真的男人最帥!」、「唱得好好喔」等,可以話係對佢讚不絕口!

期間攝影師多次以近鏡頭zoom向劉愷威嘅樣貌Photo from 《中秋晚會2022》

於《披荊哥哥2》獲讚五官精緻!

近日,劉愷威仲有份出演真人騷《披荊斬棘的哥哥2》,雖然佢並未有好似吳卓羲咁能夠引起火爆話題,但性格文靜嘅佢經常都靜靜觀察其他「哥哥」,獲網民大讚係「溫文爾雅的君子」;仲被讚五官越來越精緻!

劉愷威最近有份出演《披荊斬棘的哥哥2》Photo from 《披荊斬棘的哥哥2》

節目中相對上比較文靜,但俊俏外貌依然受到內地網民關注!Photo from 《披荊斬棘的哥哥2》

其實劉愷威過往被指外貌變化大,表情僵硬更令網民懷疑佢曾經整容。宜家即睇佢入行以來嘅外貌變化啦!

TVB時期(1994-2005年)

劉愷威為大台效力時,曾出演《創世紀》、《皆大歡喜》等經典電視劇,當時嘅佢樣貌清澀,雙眼大部分時間都係單眼皮。

劉愷威喺TVB拍攝過唔少經典劇集Photo from 《創世紀》

不過當時嘅佢雙眼係單眼皮嘅Photo from 《皆大歡喜》

即睇更多人氣文章:

2005年後離巢北上發展

離巢後,劉愷威都花咗幾年時間先成功喺內地嶄露頭角。喺2008年,佢憑電視劇《鳳穿牡丹》飾演「霍冬青」一角而變得為人熟悉,而當時佢嘅雙眼皮就已經變得比以前明顯咗好多!

2008年劉愷威出演電視劇《鳳穿牡丹》人氣開始急升!Photo from 《鳳穿牡丹》

2010年劉愷威出演嘅《千山暮雪》爆紅,再度奠定佢喺內地男星嘅地位。Photo from 《千山暮雪》

2013年與女星楊冪結婚

劉愷威與細12年嘅內地女演員楊冪因合作拍攝電影而擦出愛火,其後二人喺2012年有機會以情侶檔身份拍攝電影《Hold住愛》,電影中劉愷威嘅雙眼皮有少少浮腫,似乎唔太自然?!二人隨後喺2013年結婚,育有一名女兒小糯米,並於2018年宣佈離婚。

劉愷威與楊冪因為合作而擦出愛火!Photo from 《hold住愛》

拍攝電影嘅時候,劉愷威嘅雙眼皮似乎有啲唔自然?!Photo from 《hold住愛》

劉愷威與楊冪於2013年結婚,但於2018年宣佈離婚!Photo from 微博

2016-2018年:變返做內雙眼皮?

其後,劉愷威嘅雙眼皮狀態似乎唔係咁穩定,偶爾會出現極明顯嘅雙眼皮,但偶爾又會變返做內雙眼皮,未知係咪受水腫影響呢?!

2016年時期嘅劉愷威Photo from 劉愷威微博

而佢嘅雙眼皮似乎變返做內雙眼皮?!Photo from 劉愷威微博

上年被網民指表情僵硬?!

上年劉愷威都有獲內地電視台邀請出席中秋節晚會《灣區升明月》,當時佢以三七面喺鏡頭面前做訪問,被網民指似黎明及梁朝偉!但部分網民就覺得佢表情有啲僵硬,樣貌亦似乎「升級」咗?!

劉愷威2021年都有出席中秋晚會《灣區升明月》Photo from 抖音

部分內地網民覺得佢似梁朝偉同黎明混合體?!Photo from 抖音

其後喺上年年尾,劉愷威出演真人騷《美好的星城》擔任嘉賓,卻被網民指外貌走樣,雙眼浮腫,眼袋非常大,而且蘋果肌好似明顯比之前下垂。

劉愷威上年年尾出演《美好的星城》時被指大走樣?!Photo from 《美好的星城》

當日嘅佢眼袋浮腫Photo from 《美好的星城》

曾正面回應整容傳聞!

外界對於劉愷威入行後「外貌升級」一直都議論紛紛,唔少網民猜測佢曾經整容。而劉愷威喺2015年接受由黎芷珊主持嘅節目《最佳男主角》,首度正面回應相關傳聞「總之沒加過東西,也沒拿走過東西就是這樣。」但當時大部分網民都似乎唔太相信呢番話,批評佢講大話!

2015年劉愷威喺節目《最佳男主角》回應整容傳聞。Photo from 《最佳男主角》

佢隱晦咁表示樣貌並冇加工過Photo from 《最佳男主角》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

楊冪自爆唔怕另一半貪錢,霸氣表示:因為我有錢!傳身家高達59億!回復單身後緋聞對象都係弟弟類型?

11 May , 2022

內地一線女星楊冪曾出演多部電視劇、電影等,近年仲開始發展唔同嘅事業,吸金力強~最近,佢獲邀上真人騷《毛雪旺》並大談自己嘅感情觀,指唔擔心將來嘅伴侶係「軟飯王」,霸氣咁話「我可太開心了,因為我有錢!」

楊冪現時依然係內地嘅一線人氣女星~Photo from 楊冪微博

楊冪變成內地一線女星

現年35歲嘅楊冪童星出身,4歲就開始拍劇,直到2003年再正式出道。過往佢曾經拍攝多部經典電視劇及電影,包括《三生三世十里桃花》、《小時代》系列、《古劍奇譚》等,人氣極高,係內地嘅一線女星!近年佢開始著手發展幕後事業,變成電視劇製片人以及娛樂經紀人公司老闆,吸金力超強~

楊冪2003年出道,拍攝過多部經典電視劇及電影,知名度高!Photo from 楊冪微博

罕有大談感情觀,不介意另一半「為錢」

早前,楊冪獲邀上真人騷《毛雪旺》,佢於節目中開腔大談對感情嘅睇法。主持人毛不易詢問佢「戀愛中的安全感來自哪?」,楊冪隨即回答「自身吧」,仲揚言「如果他是因為我有錢而跟我好的話,我可太開心了,因為我有錢。」言下之意即係唔介意將來嘅另一半賺到嘅錢比佢少!呢番霸氣嘅言論隨即獲網民感到羨慕不已~

楊冪最近出演節目《毛雪旺》Photo from 毛雪旺微博

認為戀愛中嘅安全感全源於自己!Photo from 毛雪旺微博

仲覺得即使對方係喜歡佢嘅錢,都唔會介意!Photo from 毛雪旺微博

傳身家已達59億!

外界盛傳楊冪身價高達50億人民幣(約港幣59億港幣),絕對有資格講出以上呢番話!現時嘅佢同時擁有多個代言、戲約,加上投資有道成為「嘉行傳媒」老闆之一,旗下藝人就有同樣係一線女星嘅迪麗熱巴~

據悉楊冪現時身家已經達到59億港幣!Photo from 楊冪微博

楊冪旗下公司仲有人氣女星迪麗熱巴~Photo from 迪麗熱巴微博

2013年與劉愷威結婚,2018年正式離婚!

同一時間,唔少網民十分心疼楊冪,祝福佢能夠盡快搵到情投意合嘅另一半~過往楊冪與劉愷威於2013年結婚,並誕下女兒「小糯米」;然而二人2015年就開始爆出婚變傳聞,直到2018年先正式對外宣佈離婚!

2013年,楊冪與劉愷威結婚,並誕下女兒「小糯米」Photo from 電影《Hold住愛》

不過2015年開始就屢傳婚變,直到2018年宣佈離婚!Photo from 電影《Hold住愛》

與內地男星魏大勛傳緋聞

回復單身嘅楊冪感情生活都備受大眾關注!過往曾多次與比佢細2年嘅男星魏大勛傳出緋聞,網上流傳多張疑似二人約會嘅照片;而本身二人一齊固定出演嘅綜藝節目《密室大逃脫》,男方喺緋聞傳出嘅時候退出節目,種種跡象反而令網民覺得佢哋似係默認戀情?!然而,上年8月傳媒就大爆二人已經分手。

之後,楊冪曾與魏大勳傳出緋聞Photo from 《密室大逃脱》

雖然二人並冇正面回應過戀情,但內地網民都堅信佢哋曾經一齊過?!Photo from 《密室大逃脱》

與公司旗下藝人19歲周柯宇熱戀?!

上年11月,楊冪與年僅19歲嘅富二代周柯宇傳出緋聞。眼利嘅網民發現二人會深夜相約打機,就連七夕、生日等重要日子都會一齊玩,亦會使用情侶「角色skin」!不過由於周柯宇係楊冪公司旗下藝人,所以部份網民二人關係親密都係正常嘅~

上年年尾,楊冪與細16年嘅周柯宇傳出熱戀!Photo from 周柯宇微博

網民發現二人經常半夜一齊打機雙排!Photo from 微博

已經超過1年無法與女兒見面!

而本身工作忙碌嘅楊冪似乎亦甚少來港探望女兒「小糯米」,據悉因為疫情關係已經接近2年冇見過囡囡;而前「老爺」劉丹上年就表示甚少聽孫女提及媽媽,但呢句話就激嬲唔少內地網民;而最近佢接受傳媒訪問時再度被問到會否安排「小糯米」與楊冪見面,但佢都一概回應「我真係唔知啊!」

據悉,楊冪已經接近一年多冇見過囡囡!Photo from 楊冪微博

劉丹多次被傳媒問到有關楊冪與小糯米嘅事情,而佢就一概以「唔知道」回應!Photo from 《愛回家》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel