鄭伊健隔近4年11月開演唱會完騷或與太太蒙嘉慧享受悠長假期

Digital Content Writer

聽日（4號）就係鄭伊健嘅55歲生日，佢日前宣布會係今年11月開演唱會，希望透過演唱會發放歡樂，又指希望正日本打理房地產公司嘅太太蒙嘉慧（Yoyo）可以到場睇騷，仲表示完騷就會同太太繼續悠長假期！

Photo from IG＠ekin_cheng_official 截圖

公布演唱會+生日雙喜臨門

鄭伊健日前宣布會係11月21號至24號、26號至27號係紅館開共6場「Here & Now 2022鄭伊健演唱會」，距離佢上次演唱會已經隔近4年，是次為慶祝開騷，唱片公司仲為伊健舉行發布會，送上生日蛋糕預祝佢4號嘅55歲生日，可謂雙喜臨門！

Photo from 娛樂新聞台截圖

佢表示開騷決定得好突然，雖然公司對開騷計劃已久，但因疫情多次延期，最後經投票決定係11月如期舉行﹐仲大爆投票時「惟獨我一個唔贊成開！」仲爆自己成日話「不如唔好做」，但今次想藉演唱會帶娛樂比大家，發放正能量。

Photo from 娛樂新聞台截圖

今次演唱會會改成三面台，伊健話希望可以帶到新鮮感比歌迷同觀眾，音樂電影設計同劇本都由伊健親自操刀，主題圍繞近幾年世界嘅變化，「希望大家好似睇緊一套Live嘅電影，有歌又有表演，有少少抽象，會憑歌寄意」。

Photo from 娛樂新聞台截圖

由於早前有演唱會發生舞台事故，伊健都表示會特別小心，希望將事件由逆變正，指自己係歌手，但要舉行演唱會唔係歌手一個人嘅事﹐團隊合作非常重要，仲透露會有視覺藝術美學襯托歌曲，係舞台上落足心思。

Photo from 娛樂新聞台截圖

伊健過往嘅演唱會都甚少請嘉賓，佢就透露「嘉賓真係未知」，講到嘉賓相信唔少得伊健一班《古惑仔》兄弟，不過成員唔少都選擇北上發展，網民就表示唔太想睇陳小春、謝天華等「大灣區哥哥」；而年前黎明嘅演唱會就邀請過伊健做嘉賓，兩人仲合唱《友情歲月》，網民更期待伊健請返黎明呀！

Photo from LIHKG截圖

Photo from 《古惑仔》電影截圖

Photo from 娛樂新聞台截圖

發布會上傳媒大讚佢現時身型好fit，鄭伊健就謙稱「假象黎嘅」，不過就話自己不嬲都有行山，又提到自疫情以來大家都容易患「疫情肥」，不知不覺間就唔同咗樣，佢認為身體狀態好重要，大家都會因為無法外出又或者要戴口罩等因素而無做運動，所以鼓勵大家要注意健康。

Photo from IG＠ekin_cheng_official 截圖

鄭伊健同太太蒙嘉慧婚後低調甜蜜，兩人係日本發展房地產生意，幾乎係日本長居，伊健發公布演唱會消息亦都第一時間幫手宣傳，而伊健亦提到雖然有好多未確定因素，但都希望太太可以到場睇騷！

Photo from 蒙嘉慧 Yoyo Mung Facebook

Yoyo曾經係社交平台投訴被鄭伊健話佢係肥婆，被問到係咪成日話太太肥，伊健就即刻搖頭話無，改口話「佢強壯咗姐」，不過就話強壯但無keep住操就會變肥。

Photo from 蒙嘉慧 Yoyo Mung Facebook

被問到完騷後係咪就會返日本陪Yoyo，伊健就坦言不嬲贊成大家去旅行睇多啲，係咪去日本又未必，但鼓勵大家可以試下悠長假期，「望下個世界係咪真係適合自己」，又表示仲有好多地方值得去，世界變化得太快，「唔睇嘅嘢可能就再睇唔到，但我哋睇到嘅嘢，就會留喺自己腦裡面。」

Photo from 蒙嘉慧 Yoyo Mung Facebook

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

【想隨時隨地緊貼本地食買玩資訊？】

👉🏻 即刻Follow我地Instagram holidaysmart.hk

👉🏻 訂閱我地 Youtube Channel