港台觀眾林婆婆爆笑狂講菜名，「歌唱組合」變「蔬菜組合」，主持都忍唔到笑

生活熱話

By Wing Ws on 14 Apr 2023

Digital Content Writer

無綫前新聞主播梁凱寧噚晚分享港台節目中，家庭觀眾林婆婆嘅挑戰片段，不過婆婆聽錯題目，將「歌唱組合」聽做「菜名」，狂講蔬菜名，搞到主持都忍唔到笑，網民更大讚婆婆精靈可愛。

Photo from 港台

「歌唱組合」變「蔬菜組合」

無綫前新聞主播梁凱寧噚晚（13日）喺IG分享港台《香江暖流》節目片段，片中正進行「極速15秒」環節，邀請咗家庭觀眾林婆婆挑戰，以贏取禮品，主持鄧添樂向林婆婆表示題目係要答出最多嘅「歌唱組合名稱」，並要喺限時15秒內答出。

Photo from 港台

不過未開始，林婆婆已經不斷問：「講咩呀？」、「菜呀？」、「蔬菜呀？」、「係咪菜呀係咪菜呀」，主持鄧添樂糾正並重覆題目：「唔係菜呀⋯⋯歌唱組合嘅名稱」、「嗱，聽清楚先，問題就係⋯⋯」，但未等鄧添樂講完，林婆婆就迫不及待咁答：「菜心、白菜、芥菜、唐蒿菜、菠菜、生菜⋯⋯」鄧添樂於是提醒婆婆：「嗱，未開始計時嘅，林婆婆、林婆婆，停一停先⋯⋯嗱，未開始、未開始，聽清楚問題先！」於是再重複問題，並開始倒數畀林婆婆作答，點知林婆婆都係照答：「生菜、白菜、芥菜、番茜菜、西洋菜、唐蒿菜、菠菜⋯⋯」鄧添樂忍笑提醒：「唔係菜呀」、「嗱，計緊時㗎啦，仲有5秒。」但聽完鄧添樂嘅說話，林婆婆照繼續答菜嘅名稱：「菜心、生菜⋯⋯」最後鄧添樂笑住咁暫停對方，並提佢：「唔好意思，條題目呢，係『歌唱組合嘅名稱』，咁所以呢，頭先係冇分嘅」，又安慰婆婆：「唔緊要，志在參與呀嘛。」

Photo from 港台

在 Instagram 查看這則貼文

Maggie Leung 梁凱寧（@maggieleung0722）分享的貼文

有關片段引起熱議，網民大讚婆婆可愛，有人表示：「欣賞婆婆一口氣講曬咁多唔同類型嘅菜好精靈！」事實上，歷來都有唔少直播爆笑事件，我哋一齊重溫吓啦～

Photo from TVB

新聞主播麥詩敏報「中東呼吸綜合症」

無線新聞主播麥詩敏報新聞時曾將「中東呼吸綜合症」讀成「中東呼吸中級綜合呼吸中東呼中級呼吸中東呼吸綜合症」，而成為網絡熱話。

Photo from 麥詩敏 IG

學生黑雨返校，慘被揭未做完功課

2013年5月，天文台發出黑色暴雨警告，學校停課，無線新聞記者羅若安採訪一名學生時，揭發該名學生未做完功課，記者當時帶有質問語氣問：「你知唔知今日黑雨㗎？」、「即係你起身冇開電視？」，學生坦言唔清楚消息亦冇開電視，記者接著問：「咁唔駛返學呀……咁你而家點呀？」、「咁有咩嘢打算呢？」，學生表示：「都算好開心！」、「我想返屋企！」，記者再問：「返屋企做乜？」學生於是表示：「做功課……做埋啲功課佢……」、「仲有少少未做好！」有關影片引起熱議，網民笑指記者個語氣好似訓導主任咁，而學生就好慘，全港都知道佢未做完功課。

Photo from TVB

岩布仙尼唱生日歌

提到前AC米蘭球星岩布仙尼，唔少人都會諗起當年亞視主持朱慧珊邀請岩布仙尼一齊唱生日歌時，岩布仙尼被迫開口唱：「Happy Birthday To Me」，引起網民爆笑，至今岩布仙尼每年生日post相都會被網民抽水留言。

Photo from ATV

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

港男世界盃受訪衝出國際！被問應否搵香港女生做老婆，回答超爆笑

30 Dec 2022

2022年卡塔爾世界盃已完滿結束，最近一位香港人夫接受外國網紅Alex Shults訪問竟獲逾5萬likes！佢身穿「香港勁揪」T裇，更爆笑呼籲主持人唔好喺香港搵老婆，令主持都忍唔住大笑，網友笑言佢根本「玩命」！

Photo from Alex Shults IG

TikTok網紅Alex Shults訪問港男掀熱議

今屆世界盃備受關注，話題度爆燈，決賽阿根廷對法國十分刺激，最終由阿根廷贏得冠軍，美斯成功圓夢帶領阿根廷奪大力神盃，「登基」做球王。除咗球場內比賽掀起熱議，球場外亦有唔少笑料。

Photo from FIFA IG

一位外國TikTok網紅Alex Shults就喺球場外訪問嚟自全球多國嘅球迷，其中一位嚟自香港嘅男士嘅訪問片段喺IG like數多逾5萬，遠超其他訪問片段，引起網民討論，到底點解咁受關注？！

Photo from Alex Shults IG

香港大叔著「香港勁揪」T裇

片中中年男士身穿「香港勁揪」紅色T裇，十分搶眼，Alex Shults首先問佢嚟自邊度，自稱「Yu」嘅男子表示佢係香港人，於是Alex Shults就問佢香港女生點樣，Yu就皺住眉咁話：「Hong Kong...OK la...not too bad」，但佢補充香港足球「not good at all」。