周遊關西｜6大食買玩景點！和歌山天空之鏡/隱世宮崎駿《天空之城》打卡地（第一集精選）

By Jennifer on 13 Jun 2023

Digital Editor

「日本通」周奕瑋Jarvis新節目《周遊關西》播出，和歌山4日3夜之旅第一集就介紹咗6個景點，包括和歌山天空之鏡、豪華海鮮宴、無人島露營、九種士多啤梨任摘放題、天空之城打卡地等！

和歌山天空之鏡

關西新興打卡點「和歌山天空之鏡」天神崎，不過要達成天空之鏡係有3個條件：第一，要係潮退嘅時間，水位介乎140～150cm之間；第二，必須係晴天；第三，唔可以太大風，否則就做唔到波平如鏡嘅效果。

周奕瑋推薦日落時份過嚟打卡，效果更震撼！不過一個月只有2日機會可以影到「黃昏X天空之鏡」，快啲mark底打卡日：6月15日/30日、7月14日/29日、8月11日/26日、9月8日/24日、10月8日/23日、11月7日/8日、12月8日/9日/23日。

交通：由JR紀伊田邊站出發，乘坐龍神巴士（みなべ線）於「明洋前」站下車，徒歩約15分鐘；或騎單車前往，需時約20分鐘

和歌山當地人推介白濱Toretore市場

好多人去和歌山都會去黑潮市場，但周奕瑋表示唔少當地朋友都會去Toretore市場，不論規模、新鮮程度、CP值都唔輸黑潮市場，除咗刺身，仲可以BBQ，原條真鯛魚刺身$100有找！

白濱とれとれ市場（Toretore Ichiba）
地址：和歌山県西牟婁郡白浜町堅田 2521
交通：於JR白濱站轉乘明光巴士於「とれとれ市場」站下車

白濱無人島Glamping

周奕瑋介紹無人島豪華露營，營地共有9個帳篷，更有私人沙灘同桑拿房。營地中最豪華嘅帳篷飽覽180度白濱海灣景色，連浸浴都可以望住海景！營地更設有露天酒吧，每日6點～10點，所有飲品都係免費任飲。

An Eland（エランド）～グランドーム和歌山白浜
地址：和歌山県西牟婁郡白浜町堅田2368‐3

9種士多啤梨任摘放題

中意食士多啤梨嘅朋友留意，30分鐘任摘放題可以摘到粉紅色、白色等貴價士多啤梨外，仲可以摘埋和歌山出品嘅高級士多啤梨「毬姬」，CP值超高，不過人多、或士多啤梨當造季節有機會會限制每人只可摘一粒白色品種嘅士多啤梨。

ふるーつふぁーむわかやま（Fruit Farm Wakayama）
地址：和歌山県紀の川市桃山町市場591

友島宮崎駿《天空之城》打卡位

友島係一度喺地圖上都搵唔到嘅隱世之地，但其實一啲都唔難去，只需搭20分鐘船就到。島上嘅「第三炮台遺跡」因為好似現實版《天空之城》，令人有如進入咗宮崎駿嘅動畫世界咁！友島更有另一個打卡位好似新海誠《鈴芽之旅》嘅海報。

友ヶ島
地址：和歌山県和歌山市深山
交通：由加太港乘坐「友ヶ島汽船」出發～友ヶ島，船程約20分鐘

和歌山甜點手信NO.1名物Kagerou

周奕瑋表示和歌山當地嘅朋友推薦必買Kagerou，喺全日本菓子博覽會攞過好多獎，而白濱更有Kagerou海景Cafe，可以望住海歎新鮮出爐嘅Kagerou！

福菱 Kagerou Cafe
地址：和歌山県西牟婁郡白浜町1279-3

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

《解風東京》杜如風開箱新景點！高CP值海膽主題餐廳／激抵飲酒放題！（1-2集精選！）

8 Mar 2023

咁耐冇「返鄉下」，相信大家都積累咗唔少「思鄉之情」！由日本旅遊達人杜如風主持嘅旅遊節目《解風東京》日前（6日）播出，疫情三年，期間東京有唔少新開景點，喺呢兩集，杜如風帶大家開箱新開酒店、景區等，仲有海膽主題餐廳、酒精飲品放題等高CP值餐廳，一齊睇吓有咩啱玩嘅好去處啦！

Photo from 《解風東京》節目截圖

池袋新酒店特大空間包露天風呂

集合商圈、百貨公司、美食於一區嘅池袋，食買玩都非常方便！一改大家以往印象中嘅細空間日本酒店，今集杜如風介紹當區於上年3月開業嘅特大空間酒店「Hotel hisoca ikebukuro」，酒店大堂櫃桶擺放咗日用品，包括牙刷、毛巾、沐浴露、浴鹽、化妝包等，予客人取用，亦有衣物、杯、碟等由酒店推出嘅產品予客人購買。甫進套房，便可以見到房間內嘅大床，每個房間內都有一張大枱，房內空間充裕，即使將行李鋪喺地，都仲有空間走動！最特別嘅係露台嘅露天風呂，上方天幕可以打開，而浴室內仲有桑拿房。杜如風訂嘅呢間「豪華套房」價錢為43000円（約港幣2590元）一晚。另有6人套房，可以同朋友、家人一同入住，房間內同樣有露天風呂及室內風呂，價錢為36000円（約港幣2170元）。酒店內嘅公共區域設有飲品區，每日下午3時至11時都係免費任飲，仲有board game（桌遊）可以借返房玩。大家有興趣嘅話，記得提早book定啦，因為間酒店得32間房！

Photo from 《解風東京》節目截圖

Hotel hisoca ikebukuro
地址︰東京都豊島區西池袋1丁目10-4

六本木海膽主題餐廳 6款菜300蚊埋單！

呢間位於六本木嘅「UNIHOLIC」係海膽主題餐廳，杜如風嗌咗個套餐，作為頭盤嘅「黑松露海膽布丁」，能同時品嘗到海膽嘅鮮味及黑松露風味；第二道「嚴選時令海膽」中有「鹽水海膽」及「馬糞海膽」兩款海膽，沾上昆布醬油一同享用，味道會更搭！「意式海膽醬蔬菜料理」配以野菜及海膽汁「小火鍋」，杜如風稱海膽汁食落「有腐乳味道」，非常特別！鍾意食牛肉同海膽嘅朋友就唔好錯過呢款「自家製烤牛肉配海膽」啦！加埋醬汁一啖放入口味，三者味道非常搭！主菜方面，杜如風嗌咗面頭鋪滿魚子、海膽嘅「魚子配海膽土鍋飯」，底下嘅飯加咗豉油，滿足之餘都非常好味！甜品「雪糕配海膽脆片」嘅雪糕有淡淡嘅海膽味，夠晒特別！杜如風認為呢間餐廳嘅海膽都非常新鮮，而6個菜式加埋都係5280円（約港幣320元），認真抵食！另外，杜如風提大家，呢個咁抵嘅lunch set係禮拜六、日先有得食～

Photo from 《解風東京》節目截圖

UNIHOLIC（ウニホリック）
地址：東京都港区六本木7-14-5 大和ビル 11F

池袋酒精飲品放題燒肉店

鍾意飲酒嘅朋友，相信呢間有得任飲嘅燒肉店會係東京遊嘅必去餐廳！呢間燒肉店最特別之處係枱面上嘅「水龍頭」，只要畀550円，就可以任飲1個鐘嘅Lemon Sour（檸檬加伏特加），食物則大約1000円（約港幣57元）一碟，「內臟拼盤」中有6種內臟，都好抵食！包住蒜蓉及大量蔥花（可選擇份量）嘅豬脷，肉質鬆化，亦值得一試！如果唔想淨係飲Lemon Sour咁單一，可以加150円嘅組合風味濃縮液，改變飲品味道。

Photo from 《解風東京》節目截圖

焼肉ホルモンたけ田池袋店
地址：東京都豊島区南池袋1-19-2 後藤ビル B1F

澀谷新景點 SHIBUYA SKY觀景台

疫情期間開張嘅SHIBUYA SKY成為澀谷新打卡點！大廈最高為45樓，當中觀景台有2層，第一層可以俯視東京景色，連富士山都睇到！再上一層可以見到東京鐵塔及晴空塔，呢層嘅玻璃圍欄冇咁高，大家可以喺玻璃對角位嘅打卡點影相，將東京景色盡收鏡頭中。附近仲有面向玻璃嘅休息區，杜如風推薦大家黃昏嘅時候嚟，就可以同時睇到日頭同夜晚嘅景色！另外，SHIBUYA SKY內仲有其他觀光點畀大家觀賞～

Photo from 《解風東京》節目截圖

SHIBUYA STAGE觀景台
價錢：2000円，網上預購1800円

下北澤茶師十段抹茶店

下北澤嘅Reload係舒適、慢活嘅地方，對品茶／抹茶情有獨鍾嘅朋友，絕對唔可以錯過呢間「茶師十段抹茶店」，因為呢間有獲得「茶師十段」（全日本僅15人獲得）嘅茶師商品，相信作為手信送畀長輩都唔會失禮！仲有得即場沖茶（抹茶可選擇甜度），可以一品職人手藝！店內仲有抹茶雪糕，味道濃郁！

Photo from 《解風東京》節目截圖

しもきた茶苑大山
地址: 〒155-0031 東京都世田谷区北沢３丁目１９−２０ reload 1-11

有樂町療癒感花藝打卡展！

銀座旁邊嘅有樂町有個互動體驗花藝展覽，啱晒打卡之餘，仲可以幫你療癒身心！展覽以花為主題，主要分成五區，主打五感體驗，入場嘅大花槽就有一個花型射燈裝置，喺手上綻放嘅同時能獲取消毒酒精，大家可以利用入場用嘅二維碼回答有關問題，獲得推薦嘅香薰、茶飲，睇完展覽去到隔離嘅cafe，仲可以獲得專屬嘅調製飲品，非常人性化！