白種元食香港平民茶餐廳埋單4,000元！網民質疑銷售手法！呢種餸貴得合理？！

時事熱話娛樂新聞

By Jennifer on 23 Jun 2023

Digital Editor

「韓國廚神」白種元嚟香港歎美食，佢最近喺個人YouTube頻道上載咗香港遊第四集，佢同幾位工作人員去咗土瓜灣一間平民茶餐廳聚餐，埋單竟高達$4,000港元！有人質疑白種元因為係外國人而「被人劏」，但亦有網友認為價錢係合理。

Photo from 白種元YouTube

「韓國廚神」白種元YouTube香港美食之旅

白種元（백종원）喺韓國創立多個餐飲品牌，之後獲電視台邀請拍攝一系列美食綜藝節目，《家常飯白老師》、《白種元的三大天王》、《白種元的胡同餐館》等，人氣極高，更有「韓國廚神」之稱。

白種元曾到多地品嚐美食，佢早前亦嚟咗香港，並將香港美食之旅放上個人YouTube頻道，一共分為4集，每一集嘅view數都超過100萬！佢去過川龍飲早茶、等1個鐘食香港仔艇仔粉、中環吉士笠街斜路牛雜老字號食牛雜麵，對香港美食有一定嘅認識。

Photo from 白種元YouTube

香港平民茶餐廳白種元與工作人員聚餐埋單4千元

佢近日喺YouTube頻道上傳香港美食遊嘅第四集，今次佢到訪香港茶餐廳與一班工作人員聚餐，最後埋單$4,000元，掀起網民熱議。白種元連同工作人員一共8人，佢哋點咗排骨、雞、炒蜆、蒜蓉蒸蝦、蒸龍魚等菜式。

Photo from 白種元YouTube

白種元嗌飽後，老闆娘狂推薦再點扇貝同蟹

之後老闆娘推薦佢哋再嗌個青菜，又提議佢哋試下扇貝同蟹，另外又上咗一桶啤酒，白種元都忍唔住笑道：「我睇落似好有錢咩？」雖然白種元表示已經好飽，但見到餐廳又出去買咗海鮮，佢即表示：「幫佢哋（餐廳）衝下業績。」

Photo from 白種元YouTube

白種元指海鮮通常用嚟招待客人，價格會貴三四倍，直言：「走之前被宰一下，這也是對彼此嘅美德吧？！」最終佢哋食咗20碟餸，埋單$4,000港元！不過佢大讚廚師係隱藏嘅高手，好似招牌菜走地雞咁，煮到骨未熟透亦係實力嘅一種，坦言自己都要學習。

Photo from 白種元YouTube

網民評論兩極：被人呃定係合理價錢？！

影片出街後，有人質疑白種元「被人劏」，有網友反駁食成20碟餸，仲有海鮮，$4,000根本係正常價，但亦有人認為有好多餸根本唔係白種元自願嗌，好似扇貝同蟹咁，但老闆都去咗買，搞到白種元不得不點，直指咁嘅銷售手法都係「劏」嘅一種。

Photo from LIHKG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

港女食Omakase埋單$2028呻中伏，不滿食材廉價有魚蛋蘿白、賣相參差

16 Dec 2022

近年香港唔少日式餐廳都有做Omakase，雖然價錢偏貴，但仍十分受歡迎！最近有網友喺網上分享佢去食Omakase，2位埋單$2028，但食材卻相當普通，佢質疑根本唔值呢個價錢，掀起熱議。網民紛紛表示其實賣相都好一般！

Photo from 劇照

蔡瀾曾指Omakase「搵笨」？！

蔡瀾曾表示Omakase「當所有客人是笨蛋」，一度引起網民共鳴，不過都仲有好多港人會食Omakase。Omakase主打由廚師發辦，一般Omakase嘅份量唔算多，但食材多數都十分矜貴，因此價錢亦唔便宜。

Photo from 劇照

網民食Omakase呻中伏：食材廉價＋賣相參差

近日有網民喺Facebook群組「飲食黑店大全(全港食店質素關注組)」發文，佢表示去咗食串燒omakase，收$888每位，其實呢個價錢喺Omakase十分正常，但食材卻令事主非常不滿。

Photo from Facebook群組「飲食黑店大全(全港食店質素關注組)」

事主發帖稱：「完全無水準之餘，食材全部唔係上等食材，伏中之伏」，從佢公開嘅相片嚟睇，呢餐有疑似串燒鯖魚、雞翼等，但的確唔見有咩矜貴食材，其中仲有蘿蔔魚蛋、烚蛋加釀冬菇等「平民菜式」，隨即引起網友熱議。

Photo from Facebook群組「飲食黑店大全(全港食店質素關注組)」

除咗菜式夠「貼地」之外，網民亦指唔少菜式賣相十分一般，白子、蜆、蠔等感覺唔新鮮，仲有一碟疑似係「咖喱魚蛋」嘅菜式，甜品係紅豆牛奶布丁加燒菠蘿，事主表示：「埋單$2028/兩位，我究竟食咗啲乜？」、「全程加埋甜品total 12樣嘢，$200/位都唔值。吃了個教訓」

Photo from Facebook群組「飲食黑店大全(全港食店質素關注組)」

網民：200蚊放題仲好餸

唔少網友同情事主：「食200蚊放題都好餸過依到」、「去日本，厨師當你係貴客，在香港，厨師當你係羊牯」，有網民發現事主仲叫多咗礦泉水，收費$68，直言「好貴」！有網友認為Omakase應提供埋飲品：「另外一個亮點係咪嗰支礦泉水，人頭成九百幾連水都冇杯？」事主則回覆稱佢食飯習慣叫返支sparkling water，同餐廳無關。