煲劇點可以淨係煲劇集？10套唔可以錯過嘅動畫！識煲一定煲埋動漫！冒險、少女、飲食、治癒樣樣有～

新年去親戚到拜完年就冇野做，度度都未開鋪，煲劇又差唔多煲哂。做咩好？不如同小編一樣煲下輕鬆搞笑嘅動漫啦~

首先，鍾意冒險嘅話，就要睇最近出左新一輯嘅《百變小櫻》。故事講述一個叫小櫻嘅女仔唔小心打開左一本魔法書，令到入面嘅魔法卡唔見哂，所以就踏上收集魔法卡嘅旅途。途中同唔同嘅朋友、強大嘅敵人相遇，係愛與勇氣嘅故事～
第一輯《百變小櫻magic card》有46集，第二輯《百變小櫻 櫻之卡篇》有24集嫁，可以慢慢煲～

Photo from 百變小櫻 官網

而最新嘅《百變小櫻clear card》就由今年嘅1月7號開始逢星期日播～有咁多集，唔怕太快煲完啦！

Photo from 百變小櫻 官網

鍾意睇青春激勵嘅話，小編有三套推薦！分別係《輕音少女》、《排球少年》同《Free!熱血自由式》。
《輕音少女》嘅故事係講一班因夾band而聚埋一齊嘅女仔，由最初唔夠成員到之後成班姊妹一齊玩音樂、一齊經歷初中高中，一齊有笑有淚咁成長～
想回味下以前嘅青葱歲月，就要仲煲下呢套有兩季嘅動漫喇！

Photo from 輕音少女 官網

唔好漏左煲翻外篇同電影版呀～

Photo from 輕音少女 官網

《Free!熱血自由式》就講一班鍾意游水嘅兄弟聚埋一齊，唔同性格嘅大家點樣相處嘅故事。睇完應該會勾起兄弟手足一齊闖蕩嘅日子～
睇完覺得唔夠可以煲埋劇場版，再唔夠，今年夏天預計會出第3季！可以期待下～

Photo from Free! 官網

《排球少年》可以話新新地，因為前年年尾先啱啱做完第三季。故事講主角因崇拜同自己一樣矮小嘅「小巨人」而開始打排球，因為打排球識到一班感情好嘅隊員，輕鬆搞笑得嚟又熱血！

Photo from 排球少年 官網

其實飲食類嘅動漫都好好睇嫁！好似《日式麵包王》同《食戟之靈》，都係同食物有關嘅熱血動畫。
《日式麵包王》嘅主角（東 和馬）細細個開始整麵包好叻，夢想整出有日本特式嘅日本麵包。每次和馬整嘅麵包麵好創新、好有驚喜，所以唔怕悶～雖然已經14年前，但係都好睇到要一再翻煲，仲有69集咁多，唔怕太快煲完會空虛啦～

Photo from 日式麵包王 官網

《食戟之靈》就講煮野食，主角（幸平 創真）每次都可以用創新嘅idea煮新菜色去扭轉難關。不過深夜睇呢套動畫真係好邪惡，因為佢畫到啲食物好真好juicy，啲食評又講到好正咁，睇完又肚餓～出到第3季嘅佢，今年4月決定開第4季，一定唔好錯過呀！

Photo from 食戟之靈 官網

Photo from 食戟之靈 官網

講到sweet愛情系列，一定唔可以少左《元氣少女緣結神》同《會長是女僕大人》啦～
《元氣少女緣結神》嘅女主角機緣巧合下做左「結緣神」，同狐妖結緣之後，一齊衝破障礙愛情故事。上年啱啱出哂嘅最終番外篇《過去篇》一定要睇呀！係男女主角嘅結局～

Photo from 元氣少女緣結神 官網

《會長是女僕大人》真係睇完會少女心爆發！女主角係倔強又獨立嘅會長，男主角係柔情又乜都識嘅學長，兩個人磨合嘅時候火花四濺～窩心得嚟又幽默，但係得一季，好快睇哂～

Photo from 會長是女僕大人 官網

最後新一年想俾小妖怪治癒下，就要睇《不愉快的妖怪庵》同埋新翻嘅《小木乃伊到我家》喇～
《不愉快的妖怪庵》講男主角有睇到妖怪嘅能力，所以喺妖怪庵到打工，用佢嘅善良去幫助有困難嘅妖怪。睇完會覺得男主好暖，比男主治癒多過啲妖怪～

Photo from 不愉快的妖怪庵 官網

係新翻動漫，暫時做到第5集，但已經覺得好好睇～男主角嘅爸爸成日寄嘅古靈精怪嘅手信翻嚟，今次寄左隻小木乃伊翻嚟，叫男主角同佢做家人。小木乃伊好萌～就算佢唔識講野，就咁睇佢啲動作都覺得佢好卡哇依～

Photo from 小木乃伊到我家 官網

Photo from 小木乃伊到我家 官網

介紹左咁多套，希望有一套可以陪你渡過空虛嘅時間啦～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載

Holiday長期歡迎大家投稿～我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物～投稿可以傳送到 holiday@presslogic.com比小編檢查一下先，記住要附上100字內自我簡介。 另外文章一經採用，編輯將會進行潤飾。期待你哋既大作啊！
Follow Instagram: holiday.presslogic