西藏旅行必帶行李用品!超詳盡「長文慎入」 多個小貼士令你放心去玩!

西藏旅行必帶行李用品!超詳盡「長文慎入」 多個小貼士令你放心去玩!

美食推介
ByPoon on 18 Jul 2018 Digital Editor

旅行旺季又到,近年多咗人選擇去西藏旅行,但相信大家對西藏仍然存在好多疑問,而且西藏喺一個高海拔嘅地方,身體要適應已經唔容易,加上天氣反常等等因素,總予人一種「西藏好危險啊」嘅感覺。但其實只要做足準備,去西藏旅行並唔係一般講到咁恐怖,而且絕對令你有衝動想一去再去!以下為大家嚴選就算迫爆行李都要帶嘅行李及注意事項,相信睇完會有更大信心到西藏一遊!

Tibet 3

1. 藥物+防高反藥小貼士
如果嚴選個行李就爆都要帶嘅用品其實好多,除咗一般旅行都一定要帶嘅用品,藥物一定係西藏必備首位!

唔單止係一般傷風感冒藥咁簡單,仲有防高反藥、胃藥、退燒藥、肚痛藥、水肚不服用藥物等等,總之屋企有咩藥帶咩藥,除咗天氣反常容易發病之外,由於西藏嘅飲食一般都較濃味,好多都帶辣,容易食唔慣而水土不服,因此胃藥、肚痛藥真係不可少!

有關防高反藥物
市面上有好多預防高反嘅藥物,千祈唔好因為擔心而食太多唔同類型藥物,藥物唔多唔有副作用,所以唔好亂食啊!小編今次試咗2隻藥,分別為「紅景天」同「Diamox」,兩隻用處係有分別㗎!

紅景天」係旅行2星期開始食,到真係去旅行就可以轉食「Diamox」,紅景天主要係預防高反、增強免疫力等,令身體可以更有效適應高反。而唔同牌子嘅紅景天每日食量都唔同,大家記得跟所寫指示食啊!

至於係咪真係有用,小編好難判斷,因為旅行途中轉食「Diamox」,但紅景天好處係無咩副作用,如果真係好擔心高反嘅朋友可以買嚟食。而小編推介大家搵日上深圳買,會比香港平好多,大約港幣幾十蚊已經一大盒,可以同旅伴夾錢Share。

Diamox」都係防高反嘅藥物,小編認為幾有效,只需喺上高原前2天食,感覺身體適應後就可以唔洗再食,直至感覺自己出現「高反」時先再食,以免身體過分依賴藥物。

Tibet 11

但Diamox有個副作用,就係佢真係好利尿,食完之後會經常想去廁所而且屙好多,加上西藏嘅廁所衛生欠佳,唔會想去,所以大家可免則免食太多Diamox。

而Diamox可以係香港藥房買,但唔係間間都有,而價錢一般大約$250-$290/50粒。

2. 消毒洗手液/濕紙巾
另外小編覺得簡直要同藥物排列首位嘅必帶用品,絕對係濕紙巾消毒洗手液!仲要係帶好多好多果種,係比乾紙巾更重要!

相信有留意西藏嘅朋友,都對西藏廁所嘅衛生程度有一定了解,絕對係臭同污糟到你唔想去!部分廁所仲要收費添啊!所以勸勉去西藏嘅朋友,要有定心理準備隨時豁出去喺大草原解放,小編相信試完一次之後,大家整個旅程都只會選擇野外如廁。

Tibet 10

到時大家可以用消毒洗手液/濕紙巾抹手,除此之外,好多地方都會令你情不自禁用濕紙巾消毒,西藏始終仍喺一個相對無咁先進嘅地方,衛生情況一定沒香港好,所以大家一定要多帶消毒洗手液/濕紙巾!

3. 防曬用品+太陽眼鏡
西藏嘅天氣其實好舒服,雖然大太陽但有涼風嘅關係,唔似香港咁熱到出汗又濕焗。但由於西藏好接近天空,所以真係唔好睇小果度嘅紫外線!小編喺香港一直屬於愛曬太陽嘅女生,而且懶得塗防曬,但入到西藏,紫外線嘅強度簡直係連身體都感受到刺痛!絕對令你無時無刻都想補防曬,所以記得帶多啲去啊,面部防曬定身體防曬都要帶!

Tibet 1

大家留意一下藏人通常兩頰通紅,其實並唔係因為搽咗胭脂,而係因為太曬而又缺乏足夠防曬而成!如果唔想返到香港黑兩度,就記得勤力做足防曬啦!

小編唔建議大家帶防曬噴霧入藏,噴霧一嚟未必上到飛機,但最重點係防曬噴霧根本唔夠力抵抗西藏嘅陽光同紫外線,帶過去都無用!唔好話防曬噴霧,小編就連用潛水用防曬乳液都唔算太夠力,結果都係黑咗少少返香港,所以建議大家買沙灘用最強度防曬乳液,仲要係厚搽果隻!

廣告
廣告

Tibet 9

另外太陽眼鏡都好重要!除咗可以防紫外線同遮太陽外,西藏嘅風隨時大到眼睛都睜唔開,可以太陽眼鏡都可以用嚟擋風!特別係如果大家青藏線入藏途徑敦煌,去沙漠玩,就一定要帶太陽眼鏡!因為好大風有可能吹沙入眼啊!

4. 保濕用品/面膜/眼藥水
防曬好重要之餘,保濕喺西藏都非常重要!入藏之後天氣一般都好乾,鼻孔內長期乾到有血絲!如果大家有任何太油太厚嘅保濕用品唔啱香港用,絕對可以帶去西藏用曬佢,保濕啫喱或者其他比較清爽嘅保濕用品未必夠支撐皮膚水份,喱個時候記得帶多啲保濕面膜,日日用都唔誇張啊!

Tibet 2

西藏乾嘅程度係有部分旅店會喺房內設加濕器,大家見有就開嚟用!所以保濕喺西藏都好重要,小編頭幾日去因係做足防曬同保濕,喺戶外活動兩三個鐘已經甩曬皮,其後都要日日用保濕面膜補救!

Tibet 4

眼藥水就可以用嚟滋潤眼睛,因為陽光同風真係會搞到眼睛又乾又澀!

5. 風褸/頸巾/帽+衣物用品需知
喺西藏完全體驗到何謂「十里不同天,一日有四季」!春夏秋冬絕對可以一日體驗曬,所以記得一定要帶足長短袖衫、長褲、Heat tech、羽絨等等又凍又暖衣物!

至於必帶又好多人忽略嘅衣物係風褸同頸巾啊!因為雖然西藏太陽好猛,但同時風好大,所以就算見到好大太陽都會感覺好凍,風褸不論係防曬定保暖都好適合!如果真係好怕曬黑嘅女仔,不妨帶一件薄風褸或者薄身外套,西藏嘅熱因為風大,就算着長袖衫都唔會好似香港咁會出汗同焗,而且係好建議大家任何時候都着長袖!

Tibet 6

其實喺西藏着衫都好有技巧㗎!強烈建議大家用洋蔥式着衫方法!因為喺西藏忽冷忽熱,大家可以入面着薄身長袖/短袖衫,再加一件厚一件薄嘅風褸/羽絨,最後放一條頸巾入袋以備不時之需。喱種着法可以天氣凍時着多d,天氣轉熱時可以除啊!如果一時因為覺得天氣凍而着一件厚針織衫,出太陽時隨時會熱到中暑!

頸巾喺呢種天氣絕對起到好大作用,因為頸巾披喺身上好保暖且擋風,天氣轉熱時掛喺頸上或放入袋都好方便!最重要係,大家如果喺野外如廁,仲可以叫朋友幫忙用頸巾遮一遮防走光!所以最好帶厚身披肩形頸巾,用途都廣泛啲!而除咗可以遮陽光之外,最重要係可以保護頭皮以免曬傷,小編就真係試過有日曬傷頭皮,其後日子見大太陽都有Keep住戴帽!

Tibet 5

另外,因為有部分寺廟會嚴禁參加者露出面部以下身體皮膚部分,所以大家除咗帶長褲同長袖衫,記得都要帶定長襪以參觀寺廟時遮蓋腳踝部分,以免去到目的地被拒入啦!但唔係間間寺廟都有以上要求,大家可以上網查詢或問當地導遊,着適當衣物去啊!

Tibet 8

其實西藏真係無大家想像中咁危險,但當然去喱種偏遠同高海拔地方,危機意識一定要有!但最重要係一定要保持開朗嘅心情去,只要做足資料搜集,帶齊嘢去就放心啦!

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook