唔好再只係提小丸子+百變小櫻啦！15套被遺忘的經典卡通片

之前成日見到啲經典卡通片post，只係提百變小櫻、小丸子、寵物小精靈、邪留丸、數碼暴龍、小魔女DoReMi，同埋哈姆太郎等等。佢地嘅經典地位無可取代，但係仲有啲比大家遺忘咗嘅卡通片，等我勾番起大家嘅童年回憶喇！（排名不分先後！）

1.動物橫町【2007年】

《動物橫町》唔單止主題曲經典，入面嘅角色都令人有深刻印象！有小美、山並先生、依沙（熊貓）、健太（熊仔）、小爾（兔仔），每一集都有啲爆笑野發生！

Photo from 《動物橫町》官網

2.日式麵包王【2006年】

東和馬擁有「太陽之手」。6歳嘅時候家姐稲穂想比佢了解麵包可以好好食，就帶咗佢到一間麵包舖。 以前見到佢整麵包，都會聞到陣麵包嘅香味！

Photo from 《日式麵包王》劇照

3.唱K小魚仙【2005年】

「有無人想encore啊？」記唔記得呢句野呢？小魚仙露芝亞、波音、麗奈，仲有沙羅、星羅、海斗等等，小編成日覺得海斗好靚仔！有網民笑話，係佢地唱得太難聽，所以先可以擊退敵人！

Photo from 《唱k小魚仙》

4.單車新人王【2007年】

山登翔:「燃燒啦,炎帝,同我心裡面嘅火焰一齊燃燒,發出無比嘅熱力喇！ 」聽到識背喇！每次睇都會有種快感！

Photo from 《單車新人王》

5.怪醫黑傑克【2005年】

黑白頭髮+面上有條疤，我諗無人唔記得啦啩！見佢好落力醫人，成個人突然間變得好熱血！呢套卡通片堅·好睇！同埋佢原先出自手塚治虫嘅漫畫，喺佢人生低潮期嘅時候，借機會向社會大肆批判，隱晦反諷。

Photo from 《怪醫黑傑克》

6.小露寶【1974年】

雖然佢好舊，但係佢重播嘅時候，小編已經出咗世！小編最記得就係紅色嘅小露寶！仲有佢首主題曲！「大踏步神情確威武 小子大名露寶 人人皆知道」

Photo from 《小露寶》

7.Keroro軍曹【2006年】

無理由唔記得佢地啦！Keroro成日話要侵略藍星，但係就同冬樹鬼咁Friend！Giroro就好鍾意夏美～Tama仔就最可愛！Kururu成日「Kukuku...」嘅笑聲。

啊！仲有成日被人遺忘嘅Dororo!

Photo from 《keroro軍曹》

8.BOM BOM彈珠人【2005年】

小編覺得彈珠人好可愛！！

Photo from 《BOMBOM彈珠人》

9.爆璇陀螺【2002年】

小編記得以前出咗呢套卡通片之後，係咁求啊媽買爆璇陀螺！

Photo from 《爆璇陀螺》

10.超速搖搖【2002年】

同爆璇陀螺一樣，嗰排好興玩搖搖！

Photo from 《超速搖搖》劇照

11.洛克人網路保衛戰 【2007年】

2005年都出過「熱斗洛克人」，但小編覺得呢集最好睇！

Photo from 《洛克人網路保衛戰》

12.我們這一家【2006年】

「別怪他～別怪他！」花師奶成日唱，劇情又寫實，真係好好睇！回憶番晒嚟！

Photo from 《我們這一家》

13.光之美少女【2006年】

最記得首主題曲係Twins唱！小編覺得雪天使好靚；黑天使就好有型！

Photo from 《光之美少女》劇照

14.衝鋒21【2007年】

熱血卡通片一套！見到佢地為場比賽咁辛苦訓練，就算落後緊，總有辦法反超前！好感動！！

Photo from 《衝鋒21》劇照

15.雙子公主【2007年】

佢地有個口頭禪：「真係不可思議啊！」小編好鍾意扮佢地！

Photo from 《雙子公主》

雖然啲美少女、公主嘅劇情有啲似，但係小編又好鍾意佢地遇到王子嘅情節，同埋同佢地一樣，覺得啲王子好有型！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）