聲音揉合城市影像 探索不一樣的香港!

由香港視覺藝術中心籌辦嘅「放浪城市」展覽，集合咗香港唔同嘅藝術家，透過聲音並揉合多種媒介，帶大家用聽覺觀察、感受呢個城市。

項目將高滲透性嘅媒介「聲音」揉合各種創作領域，例如虛擬場域、AR擴增實境帶大家探索香港。項目希望藉住帶大家漫遊香港，提醒返大家唔好忘記同居住環境間嘅關係，打開對呢個生活地方嘅想像及聯想。

「放浪城市」系列共有三個項目－－「記憶的城市 虛構的城市」、「靜靜雞摘13個如果：靜漫一種」同埋「內在的自由」，藝術家用唔同方法演繹佢哋對城市嘅印象。項目邀請咗藝術家包括：林欣傑《記憶的城市 虛構的城市》、香港浸會大學人文及創作系副教授周耀輝博士、黃照達《靜靜雞摘13個如果：靜漫一種》、香港中文大學藝術系副教授譚偉平《內在的自由》創作作品，帶大家搵番對香港呢個城市嘅感覺。

記憶的城市 虛構的城市

林欣傑收集咗幾個唔同地區嘅聲音，結合一啲影像，呈現幾個地區嘅感覺。

從虛實交錯嘅角度，同大家觀察非常熟悉嘅城市景觀以及其聲音建築。林欣傑將有形同無形嘅平行空間置換，畀觀眾見到一直存在但經常冇留意嘅媒體形態。

日期：即日起-2019年1月27日（*備註：逢星期二、12月25、26日以及2019年1月1日休息）

地點：香港視覺藝術中心（中區堅尼地道7A）

靜靜雞摘13個如果：靜漫一種

圖片：「靜靜雞摘13個如果：靜漫一種」嘅其中一個「如果」，係假設咗兩幢大廈喺到傾計。大家不妨搵吓呢個隱藏喺路線入面嘅對話標誌。

周耀輝（左三）同黃照達（左二）將十三個「如果」隱藏喺預設路線中，畀觀眾搜尋。

觀眾要利用手機程式嘅導航，跟住藝術家預設嘅路線去搵13個「如果」。過程結合住聲音、文字、圖像、裝置同城市景觀等跨媒介元素，從中體驗聽覺同視覺嘅呼應，領略一番「靜漫」。

Photo from 張志偉, Moon 9 image

Photo from 張志偉, Moon 9 image

Photo from 張志偉, Moon 9 image

日期：即日起-2019年1月27日

出發地點：中環皇后像廣場

註：參加者可下載手機應用程式「放浪城市」（Sound in the City）自行參與活動（暫時只適合iOS手機使用）

下載連結Download the app
[iOS: https://goo.gl/JaQv51] [Android: https://goo.gl/gP6ukB]

內在的自由

作品用咗唔同空間嘅交錯重疊，從走過唔同路線演繹唔同嘅故事，為咗令大家沉澱對時間同城市嘅感覺之間，追尋內在嘅自由。

日期：2018年12月14日-2019年1月27日（*備註：逢星期二、12月25、26日休息）

地點：香港視覺藝術中心（中區堅尼地道7A）

「放浪城市」系列嘅費用全免，大家不妨參加吓個項目，用第二個角度認識我哋居住緊嘅地方，睇吓同你平時感受嘅香港一唔一樣？

Presented by：康樂及文化事務署

圖片：香港動植物公園係《內在的自由》擴增實境旅程嘅其中一站。