元宵好去處2021　限定市集/打卡必到「夜櫻步道」/拜月老求良緣

元宵節就快到，話晒係中國情人節，梗係要慶祝吓啦～不過未諗到去邊？今次就為大家整理4個元宵好去處，可以去元宵限定市集，仲可以去打卡影靚相！可以同另一半或者朋友去玩啦～

銅鑼灣「Sky of Lanterns 利園元宵節市集」

利園協會將於2月26日至28日期間，一連三日舉辦元宵節市集，屆時會有近20間本地特色小店攤位齊集希慎廣場，如主打「香港製造」嘅女士服飾、具英倫風嘅男士配飾及配件、本地原創設計嘅首飾配件、手工果仁醬及精品咖啡等，可以畀大家瘋狂購物之餘仲可以買份禮物送畀另一半～

除咗購物，元宵佳節又點少得賞花燈呢？場內設置咗多個燈籠陣，繫上近40個嫣紅花燈，點綴整個場地，更添元宵氣氛。

「Sky of Lanterns 利園元宵節市集」
日期：2021年2月26日至28日
時間：中午12時至晚上7時
地點：希慎廣場9樓 Urban Sky

元朗 YOHO MALL 形點「小青森—都市農莊」

元朗「YOHO MALL 形點」由即日至4月6日與日本青森縣攜手舉辦「小青森—都市農莊」，場地以「津輕風鈴」、「弘前櫻花」、「完熟蘋果」及「睡魔祭典」為主題佈置，務求展現青森縣四大特色。今年去唔到日本旅行，都可以去「小青森—都市農莊」感受下日本氣息～

當中「魚の夜燈祭」會有由日本直送全手工製作，高70cm嘅立體「金魚睡魔燈籠」，而燈籠嘅製作過程更獲日本電視台及當地媒體報道！由多個「金魚睡魔燈籠」打造成嘅金魚燈海裝置會於夜間發亮，倍添祭典氣氛。

而逾16米嘅「聲の步道」會展示超過300個津輕風鈴，色彩清雅，印上清新圖案並繫上祝福字句，配上夜晚閃爍嘅燈飾，有如繁星相伴。

除咗「聲の步道」，仲有長30米嘅夜櫻步道，櫻花配上星燈，浪漫之餘仲重塑「青森夜櫻」嘅美景，簡直就打卡必影！

青森縣盛產蘋果，「蘋果の森」參照青森特產信濃甜蘋果作為外型，打造高達3.5米嘅蘋果小屋，屋內仲放置咗一棵「參天蘋果樹」，以小夜燈做裝飾，宛如置身童話世界。

有得影又點可以冇得食呢！活動期間，商場特意聯同場內多間食肆推出以蘋果為主題嘅特色美食，包括「蘋果金寶配香草雪糕焦糖糖漿」、「海鹽拖肥蘋果肉桂梳乎厘班戟」等，等大家可以食餐好之後去打卡！

「小青森—都市農莊」
日期：即日至4月6日
時間：上午10時至晚上10時
地點：YOHO MALL I 地下園林

元宵佳節拜月老

元宵節係中國情人節，街上愛人一對對，但係自己就獨自一人？唔怕～想新一年出 Pool 嘅朋友就要去拜吓月老求姻緣啦！嗇色園黃大仙祠將會喺元宵節當日開放月老及佳偶天成神像供善信參拜，更會延長開放至晚上9時。另外，黃大仙祠各殿堂已經完成翻修工程及燈飾裝置，所以除咗拜月老之外，仲可以欣賞燈飾添啊！

T.O.P「十萬個氹掂美美的理由」

台灣人氣插畫家 H.H 先生以及本地人氣專頁「十萬個激嬲女友的理由」首度合作，由即日至3月31日喺 T.O.P 舉辦「十萬個氹掂美美的理由」活動。H.H先生筆下的肉肉女神「美美」深受歡迎，屆時「美美」將會以虛擬實景 （AR）形象現身同大家互動。此外，場地設有「最 Girlfriend-able 探測機」，只要打開 QR Code 就可以知道你最「Girlfriend-able」嘅特質，男朋友們一於帶女朋友測試一下！

台灣有「美美」，香港都有人氣專頁「十萬個激嬲女友的理由」，今次「十萬個激嬲女友的理由」會於網上向各大情侶徵稿，題目包括「另一半匪夷所思嬲你嘅理由」、「情人節激嬲女友嘅經歷」等，專頁會從中揀出色抵死嘅徵文，以打卡牆嘅形式現身 T.O.P，等大家可以睇吓網民嘅特別經歷。

T.O.P「十萬個氹掂美美的理由」
日期：即日至3月31日
地址：旺角彌敦道700號T.O.P This is Our Place

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）