郭羨妮自爆當年選港姐同房佳麗曾撞鬼？愛貓離世疑兩度返家探望

By Celia on 29 Mar 2021

Digital Editor

藝人郭羨妮與老公朱少杰婚後育有一女，而成為人母後更減產專心照顧家庭。而近日郭羨妮就突然致電靈異節目《恐怖在線》，自爆當年入行後嘅靈異經歷。

唔少鍾意聽靈異事件嘅人都一定聽過由「鬼王」潘紹聰主持嘅靈異節目《恐怖在線》，而喺最近一集，郭羨妮就驚喜 call in 嘅自爆曾遇過嘅三段靈異經歷。

一開始時，郭羨妮先透露自己嘅愛貓喺去年 6 月時離世，懷疑愛貓兩度附身喺唔同嘅動物身上屋企探佢，佢指當時同個女坐喺露台好傷心，但女兒突然大嗌就見到一隻大大嘅草蜢出現喺十幾樓高嘅露台，當時佢就為咗保護受驚嘅女兒一手將草蜢拍死，仲沖埋落厠所。後嚟佢先諗係咪貓貓呢：「之後我將貓貓啲骨灰撒落屋企嘅植物度，希望將生命延續，突然有隻雀仔飛埋嚟我露台度唱歌，呢啲咁無可能發生嘅事，當我想攞相機影相時佢就即刻飛走咗。」

郭羨妮之後更透露當年佢入行後曾租西貢近北潭涌某單位 1 年，佢媽媽更遇上血光之災入院：「間屋好奇怪，每日都唔知自己做緊咩，搬入去全年冇買過梳化，喺屋企都係坐外景櫈，冇心機去諗點搞間屋，好冰冷。」

之後郭羨妮嘅兩隻愛犬亦不幸離世，並指當時喺嗰度住時不時都會聽到有人撳門鐘，但又冇人，所以最後一家人頂唔順住咗一年搬走咗。

而最後一件靈異事件，佢就指喺發生喺 1999 年，當年佢選港姐期間同一班佳麗去中山拍外景，佢指當時工作完返到酒店倒頭大睡，但點知第二日起身時見到同房室友，用好怪異嘅眼神望住她問：「尋晚你有冇過嚟我張床度坐？」當時佢嘅室友就指前一晚感覺到張床「凹咗」就好似有人坐喺佢張床咁，郭羨妮即否認，而佢之後就懷疑當年兩人曾移動過房內佈置，或許因此招來靈。唔知當年邊位佳麗同佢同一間房呢？！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

【好恐怖！】必睇ViuTV 《黑市》人性黑暗港產劇王貽興導演超刺激靈異劇情

03 Jan 2020

相信唔少人都好鍾意睇《奇幻潮》，覺得佢嘅靈異故事好刺激，但可惜香港好少呢類題材嘅電視劇。不過，最近ViuTV播出嘅《黑市》就一定好啱你！佢有20集，每集一個故事，每個故事都帶出人性嘅陰暗面，亦有唔少靈異、奇幻元素！有啲似ViuTV早前播出嘅《理想國》。

Photo from ViuTV

《黑市》由王貽興執導，佢接受訪問時表示佢最鍾意《偽善若水》呢集，佢話雖然劇本喺1年前寫，但同而家社會發生嘅某啲事不謀而合「嗰下應該係最心寒」。《偽善若水》係講述政府推出咗流感疫苗，但佢真正目的係要透過疫苗控制市民，令大眾反抗唔到，想帶出要唔要接受被同化嘅問題。呢個單元仲未播出，但淨睇簡介，都已經聯想到現時嘅社會狀況。