網民列出8個移民英國好處! 感嘆香港生活壓抑:終於似返個人!

網民列出8個移民英國好處! 感嘆香港生活壓抑:終於似返個人!

生活熱話
By Stephanie on 12 Nov 2021
Digital Content Writer

近年,移民嘅人數越來越多,而英國就成為咗唔少人選擇嘅國家喇~最近,有已經移民到英國嘅網民喺討論區上分享自己嘅生活,仲因此而發現香港「奇怪」嘅現象,認為香港嘅生活異常壓抑,直呼「無比較就無傷害」!

有網民於討論區列出於英國居住嘅好處,引起網民討論!Photo from TVB

現時唔少人都選擇移民,去到其他國家居住就要適應文化差異。不過有網民就分享自己移居英國後嘅所見所聞,認為比較之下香港嘅生活的確非常壓迫,並以「一人一件去到英國先知香港原來咁XX嘅事」為題,引發網民熱議!

網民認為英國比香港更好嘅事:

1 .睇樓冇咁chur

網民就話上網搵地產經紀帶睇樓,解釋得好詳盡,強調「揀啱先租」。陪你行幾個屋苑睇單位,完全唔需要支付佣金!相反,香港睇樓前就要簽下唔同文件,手續繁複,非常麻煩,仲要花心機應對地產經紀。

網民表示英國嘅地產經紀唔會收取佣金!Photo from 連登討論區

香港睇樓嘅時候,需要同地產經紀簽下文件,並且需要支付佣金。Photo from ViuTV

2 .租金低 面積大

有網民就分享話自己只係用港幣大約$8,000至9,000就租住到約700呎嘅新樓連露台,如果居住喺更加偏遠嘅地區,租金將會更加便宜。相反,同樣價錢喺香港根本冇可能搵到差唔多水準嘅住宅,感嘆香港嘅樓價以及租金都好高!

網民分享自己於英國用約8000港幣就可以租到唔錯嘅單位!Photo from 連登討論區

香港樓價超高,難以用相同價錢租同樣嘅單位居住。Photo from TVB

3 . 生活成本比較低

大部分網民都話英國嘅物價冇香港咁高,最明顯嘅就係超市買嘢嘅時候:大約£1.5 (約港幣$16)就可以買到15隻雞蛋、£2(約港幣$20)就買到一盒大嘅雞等,生活成本低時,壓力亦隨之而降低!

英國購買食物嘅物價比香港低!Photo from 連登討論區

英國超市嘅食物非常抵,生活成本比較低!Photo from TVB

4 .出街食飯唔洗迫

有網民就話去咗英國之後,出街食飯都非常chill,完全唔洗排隊,十分舒服~而香港人口密度高就眾所周知㗎喇!平時一到週末,成條街都塞到水泄不通,有網民仲話「唔知點解啲人特別鍾意一字排開咁行㗎!」,喺街道上行就已經好似「上戰場」咁,經常都要提高警覺,以免被人撞倒!

網民仲大讚英國地方大,行街食飯都好放鬆~Photo from 連登討論區

有網民就話香港街道超迫,唔少行人仲鍾意一字排開咁行,非常討厭!Photo from 連登討論區

5 .準時收工

唔少西方國家都非常講求work -life balance,就算工作幾忙碌都一定會預留時間俾自己,好好享受生活,釋放壓力~有網民就話雖然英國嘅生活節奏的確比香港慢,不過就一定可以準時放工,同香港嘅OT文化非常唔同!

網民就話英國都十分講求生活素質,所以準時放工係一定嘅!Photo from 連登討論區

香港工作時間長,有時候甚至要OT!Photo from TVB

6. 當地居民超好人+有禮貌

有網民就話英國人都非常有禮貌,而且好好人,就算唔小心騷擾到佢哋,都只係微微笑咁話「no problem~」而且見到你需要幫忙時,都會主動幫手,並非大家所講嘅咁冷漠!

網民大讚英國人都非常熱心幫助人,而且佢哋亦好nice~Photo from 連登討論區

香港地少人多,人與人之間好容易發生爭執!Photo from TVB

7 .空氣好

英國地方比較大,而且街道上都有唔少樹木。網民都覺得該地方嘅空氣非常好「連鼻敏感都冇埋」,心情亦因此而變得更加好!相反,香港一轉季嘅時候就必定會受鼻敏感所困擾,而且夏天又特別焗促,令人非常辛苦。

有網民話去咗英國之後,連鼻敏感都完全好返,非常神奇!Photo from 連登討論區

英國地方大,亦有唔少郊區地方,空氣自然比較好~Photo from TVB

8 .小朋友學習環境更加好

有家長就分享喺英國幫小朋友註冊學校嘅時候,職員都超好態度咁幫手,而且仲唔需要額外俾錢佢哋;仲話如果同樣事情喺香港發生,一定會遭到職員冷眼旁觀!另一方面,英國嘅學校並非一味注重成績,亦會幫手培養小朋友嘅興趣。而且功課量唔會好多,可以令親子時間變得更加多,學習壓力比較少。

有家長就話當地嘅學校職員都態度好好咁幫手辦理入學手續!Photo from 連登討論區

英國嘅學業壓力相對比較低,小朋友亦可以培養興趣。Photo from 連登討論區

廣告
廣告

喺香港小朋友嘅學業壓力大,功課量多!Photo from TVB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

港女突然被男友邀請一同移民 擔心要「從頭捱起」 網民:幫你安排好晒仲想點!

9 Jul , 2021

現時越來越多人想移民,但當中往往要考慮到親人去留問題。近日,一名港女上網發文,指男友有意移居外國,並且已做好一切準備,想女事主同佢一齊去。但事主擔心適應問題,亦不捨得放棄香港工作,遂向網民詢問意見。

愛回家之開心速遞 TVBPhoto from 愛回家之開心速遞 TVB

最近,一名女網民於連登討論區發文,稱拍拖5年男友向佢表達想移民到加拿大嘅意向,又指自己已整好曬所需簽證及文件,遂邀請女事主一齊移民。

愛回家之開心速遞 TVBPhoto from 愛回家之開心速遞 TVB

男方向事主保證,自己有加拿大朋友,所以到步後即可向佢朋友免費借宿。講到呢度,事主已開始擔心自己無外地朋友,出事都無真正了解自己嘅人可以投靠。

愛回家之開心速遞 TVBPhoto from 愛回家之開心速遞 TVB

事主又指,自己喺香港辛苦工作咗5年,薪金才達到2萬元,佢擔心去到外國要重頭捱過。佢亦感歎,男友剛畢業月薪已超過2萬元,其家境亦不錯,「可能佢食米唔知米貴」。

愛回家之開心速遞 TVBPhoto from 愛回家之開心速遞 TVB

事主害怕自己喺無錢無人脈嘅情況下移居加拿大,男友便會變成佢唯一依靠,「我就乜都要靠佢,如果去到佢一腳飛起我就乜都冇」。

愛回家之開心速遞 TVBPhoto from 愛回家之開心速遞 TVB

除此,事主亦擔憂自己無法適應外地生活,「好怕佢(男友)適應到,我唔得」。佢認為:「與其去到先知適應唔到,不如一早留底」。

愛回家之開心速遞 TVBPhoto from 愛回家之開心速遞 TVB

女方更認為,身為專業人士嘅男友留喺香港必定會「搵多啲」,對於男友表示到加拿大後做藍領,佢感到不解,「有時我都想問佢點解要去捱?」

連登討論區Photo from 連登討論區

對此,網民意見分歧,一部分網民認為事主應把握移民機會,唔好被貧窮限制思想,亦有人指男方想一齊移民係重視事主嘅表現。

連登評論Photo from 連登評論

連登評論Photo from 連登評論

另一派網民則認為事主男友「搞好哂啲野先通知樓主」,如此「只通知不溝通」做法係唔尊重對方嘅表現,亦有人覺得事主唔去嘅話,男方都唔care,「當拎少件行李」。

連登評論Photo from 連登評論

不支持 佢只邀請 無咗你都得

連登評論Photo from 連登評論

有男網民表示同意,指事主喺無咩準備嘅情況下移居外地,又只能依附男友,「同賣你豬仔冇分別」,仲建議事主同不可靠嘅男友分手。

連登評論Photo from 連登評論

連登評論Photo from 連登評論

最後,事主更新,指已向男友表達各種擔憂,但男方態度卻不認真,「笑住咁講,會適應到,會幫我點點點,一啲都唔認真囉」。咁樣令事主毫無安全感,所以,佢擱置咗移民想法。

連登評論Photo from 連登評論

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel