細數12個90後兒時潮物!召喚童年回憶!轉轉筆/有轆波鞋/推蓋手機

細數12個90後兒時潮物!召喚童年回憶!轉轉筆/有轆波鞋/推蓋手機

生活熱話
By Stephanie on 14 Jan 2022
Digital Content Writer

人大咗難免會懷念過去,想念細個時天真無邪無憂無慮嘅日子~最近,有網民就喺連登討論區集思廣益,希望大家可以分享童年時覺得好有型嘅物品或者事,成功引起網民們嘅共鳴!

最近,有網民就喺討論區列出童年潮物,喚起咗唔少網民嘅童年回憶~
Photo from TVB

相信每個年代都有能夠代表當時嘅玩物,亦係唔少人嘅童年回憶之一~但隨住歲月嘅變遷,好多童年嘅玩具或者「潮物」都會變得唔再受歡迎,甚至喺市面上買唔返!而家就等我哋睇下網民們列出過嘅童年「潮物」,睇下大家係咪同年代嘅朋友仔啦~

1. 機關筆盒

學校唔允許帶玩具,所以大家都會想盡辦法將自己嘅文具變成玩具,而機關筆盒就係其中一個唔少人都想擁有嘅文具喇!大部分筆盒嘅外圍都有幾個按鈕,一按下就會令暗格彈出,喺上課時嘅解悶神器~

機關筆盒係上堂解悶嘅其中一個好幫手!
Photo from 連登討論區

而機關筆盒裡面有唔少暗格,可以擺放擦膠、膠帶等文具。
Photo from 微博

2. 發光/有轆波鞋

唔知大家又有冇擁有過會閃閃發光或者有轆嘅波鞋呢?!喺小朋友嘅角度睇,呢啲波鞋又的確係幾有型,記得細個嘅時候,著住有轆波鞋嘅朋友仔好似行路都變得好輕鬆咁~

閃閃發光嘅波鞋,大家細個嘅時候又有冇買呢?!?
Photo from Pinterest

有轆嘅波鞋令小朋友可以行得超快,不過好多時家長都會因為安全理由而唔肯買!
Photo from 連登討論區

3. SUPER-X運動袋

見到呢個運動袋之後,係咪啲回憶即刻返晒嚟呢~當時唔少人都會揹住呢個袋返學或者上運動堂,而且仲有好幾個顏色,係當年嘅潮流之一!

想當年見到好多男同學都攞住SuperX運動袋返學~
Photo from 連登討論區

4. 揭蓋手機/推蓋手機

喺智能手機尚未變得普遍之前,大家使用揭蓋手機或者滑蓋手機都會頓時覺得自己好似「潮人」咁~有網民仲話一定要擁有過一部滑蓋手機得,唔知大家以前又有冇用過呢?!

有網民就話當年用呢兩款手機就會覺得自己好潮~
Photo from 連登討論區

仲記得當時身邊好多朋友都係用Sony Ericsson呢部推機!
Photo from eBay

5. Game Boy

大部分男仔細個嘅時候都特別鍾意打機,而擁有一部Game Boy就係各位小朋友嘅夢想!有網民就回憶小學時,一位同學因為帶咗Game Boy去學校旅行,即刻個個都埋佢身~

唔少男仔細個都應該會想擁有自己嘅Game Boy~
Photo from 連登討論區

6. 轉轉筆

轉轉筆係唔少人上堂嘅時候解悶嘅工具之一,當時仲有同學會用marker幫支筆上色,變成佢獨一無二嘅轉轉筆;而大家亦非常熱衷於訓練轉筆技巧,好似個個都成為咗高手咁~

轉轉筆係唔少學生經常都攞住上堂嘅「文具」!
Photo from 蝦皮購物

大家都好努力咁練成轉筆高手!
Photo from 連登討論區

7. 爆旋陀螺/模型公仔

隨住卡通片《爆旋陀螺》嘅興起,大家都開始沈迷玩陀螺,喺公園經常都可以見到一大班小朋友坐埋一角圍住個陀螺膠盤玩!而且呢類型嘅陀螺亦有唔同嘅顏色以及款式,成功吸引小朋友購買~

爆旋陀螺成為唔少人嘅童年回憶~
Photo from 連登討論區

有網民就分享直到而家都依然覺得數碼暴龍、霹靂火鳳凰等模型非常有型,就算大個咗都依然會想擁有~

有網民就話依然覺得小時候嘅模型公仔好有型~
Photo from 連登討論區

8. 各式各樣嘅摺紙

細個嘅時候,就算只係得一張白紙都可以玩好耐~唔少小朋友識得利用紙摺飛機、青蛙等超有創意嘅嘢,有網民就話以前一定會摺「魔爪」,仲會同朋友比拼!

摺紙係細個時候必玩嘅嘢~
Photo from 連登討論區

有網民就話細個會摺魔爪~
Photo from 連登討論區

9. 超人魷魚絲襟章

相信大家都對超人襟章有一定嘅印象,因為佢真係人氣超級高!由於每包魷魚絲裡面都只會隨機派1個襟章,唔少小朋友為咗草齊都不停咁食魷魚絲~

超人魷魚絲裡面都會隨機派一個 襟章!
Photo from 香港高登討論區

唔少小朋友都希望可以草齊,仲會同朋友交換!
Photo from 連登討論區

10. 小櫻/小魔女Doremi魔法棒

《百變小櫻》同《小魔女Doremi》都係唔少女仔小時候必睇嘅卡通片,而買一支魔法棒就當然唔少得啦~無論係去公園玩或者出街都要帶住,仲識得好流利咁背出小魔女嘅變身魔法!

有網民就話細個買咗百變小櫻支魔法棒!
Photo from 連登討論區

而小魔女Doremi亦係唔少女仔嘅童年回憶~
Photo from 蝦皮

11. 翻譯機

唔少父母都未必願意購買遊戲機俾小朋友,所以大家細個嘅時候都可能試過將翻譯機當成自己嘅小電腦!因為翻譯機裡面多數都會包含幾個經典小遊戲,百玩不厭~

翻譯機都係細個嘅時候覺得好有型嘅物品之一!
Photo from HKTVMALL

 

12. 「潮流」髮型?!

每個時期所流行嘅髮型都有所不同,而好多時潮流嘅興起就係因為明星效應而引致。有網民就話當年嘅MK頭全因為受台劇影響:普遍男生就會剪「粟米鬚頭」,同棒棒堂以及飛輪海一樣;而女仔就會剪超齊嘅瀏海,並且將頭髮電到非常直!

有網民就話以前嘅髮型好似都係因為流行嘅台劇而引領咗潮流?!
Photo from 連登討論區

普遍男仔都會留斜瀏海,而且接近蓋到眼睛位置!
Photo from 《黑糖瑪奇朵》

而女仔就會剪齊瀏海同負離子~
Photo from 《海派甜心》劇照

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

8部90後必定睇過嘅經典卡通節目! 一齊嚟搵返我哋嘅童年回憶啦~

1 Apr , 2021

卡通片係陪伴我哋每一個人成長嘅好夥伴,亦可以令我哋記返起以前嘅開心時光!唔知大家仲記唔記得我哋嘅集體回憶呢?!等我哋今次一齊嚟盤點 套90後一定睇過嘅卡通片啦~

Pinterest
Photo from Pinterest

廣告
廣告

《動物橫町》

相信大家一聽到呢個卡通片,就會忍唔住唱「Rabbit齊嚟~Panda齊嚟~」!《動物橫町》係講幼稚園學生松崎小美嘅小秘密,喺佢嘅房間入面同一班迷你小動物一齊生活。後來,呢班小動物仲建造咗一條可以通往佢哋世界嘅秘密之門喺小美嘅房間。

《動物橫町》
Photo from 《動物橫町》

《動物橫町》
Photo from 《動物橫町》

唔知大家又記唔記得邊個係山並先生呢?

《動物橫町》
Photo from 《動物橫町》

《雙子公主》

《雙子公主》係講述太陽王國嘅雙胞胎公主法伊恩同蓮伊恩如何救返佢哋嘅星球同埋其餘6個國家。而佢哋兩個仲被喻為係不可思議星球裡面「有史以來最不像公主的公主」,所以成日都會有啲好好笑嘅畫面出現~

Pinterest
Photo from Pinterest

《雙子公主》
Photo from 《雙子公主》

《奇幻魔法melody》

《奇幻魔法melody》係講囚犯Kuromi同巴庫喺馬里蘭樂園逃走做出嚟,去到人間嘅世界。被王室誤會嘅Melody就收到指令要阻止Kuromi奪取人類嘅夢想,並且要收集一百個粉紅色音符先得!

《奇幻魔法melody》
Photo from 《奇幻魔法melody》

《奇幻魔法melody》
Photo from 《奇幻魔法melody》

大家仲記唔記得Melody嘅招牌動作「唔該你啊~」呢!

Pinterest
Photo from Pinterest

《Keroro 軍曹》

《Keroro 軍曹》係講一班青蛙型嘅外星人嚟到地球,想盡辦法去侵略地球而引發嘅一連串好笑事件。

《Keroro 軍曹》
Photo from 《Keroro 軍曹》

《Keroro 軍曹》
Photo from 《Keroro 軍曹》

仲記得當時好多人都鍾意Tamama,但當佢嫉妒同發射衝擊波嘅時候就會變得好可怕!

《爆旋陀螺》

《爆旋陀螺》嘅故事係講少年銀河同小學生健太因為戰鬥陀螺,而不斷認識更加多朋友嘅成長經歷。想當年,成日都會喺公園見到有人喺角落玩陀螺嘅畫面~

《爆旋陀螺:鋼鐵戰魂》
Photo from 《爆旋陀螺:鋼鐵戰魂》

《爆旋陀螺 擊爆戰魂》
Photo from 《爆旋陀螺 擊爆戰魂》

《魔界女王候補生》

相信唔少女仔都會對呢套卡通十分熟悉!故事講述兩個好朋友巧克莉同埋香草同時成為下一屆嘅魔界女王候選人,要以競爭對手嘅身分到人間睇下邊個可以收集到最多人類愛心。

Pinterest
Photo from Pinterest

《魔界女王候補生》
Photo from 《魔界女王候補生》

《忍者亂太郎》

《忍者亂太郎》係講述新丁、小丸同埋亂太郎喺忍者學校所發生嘅一連串搞笑事。相信大家都會一定記得山田老師扮女人嘅樣貌~

《忍者亂太郎》
Photo from 《忍者亂太郎》

《忍者亂太郎》
Photo from 《忍者亂太郎》

《鋼之鍊金術師》

《鋼之鍊金術師》嘅故事背景係講當時世界嘅煉金術發展的非常發達,愛德華同弟弟因為掛住已經過世嘅媽媽,所以決定要進行煉金術嘅禁忌「人體煉成」(可以令已過世嘅人復活)嘅經過,係一部大家都話非常有深度嘅卡通!

《鋼之鍊金術師》
Photo from 《鋼之鍊金術師》

《鋼之鍊金術師》
Photo from 《鋼之鍊金術師》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

90 後一定睇過嘅 7 套卡通動畫 一齊嚟暴露年齡

30 Oct , 2020

仲記得細個放學返屋企一定會開電視睇卡通片,有好多卡通動畫依家已經成為咗經典,今次就嚟盤點 7 套 90 後一定有睇過嘅卡通動畫,等大家回憶吓童年~

《玻璃面具》
《玻璃面具》故事講述天才少女「北島真夜」出生貧窮,但係非常有演技天分,每次演戲都能完美代入角色,佢努力成為演員,同勁敵「姬川亞弓」爭奪「紅天女」一角。細個睇嗰陣一見到預示「北島真夜」即將代入角色嘅嗰個鏡頭就覺得好型!

《玻璃面具》故事講述天才少女「北島真夜」出生貧窮,但係非常有演技天分。
Photo from 《玻璃面具》

《飛天小女警》
《飛天小女警》又係一套好經典嘅卡通,講述「飛天小女警」「花花」、「泡泡」及「毛毛」係美國一個都市嘅保護者,佢哋阻止銀行劫案、火場救援及防止怪獸破壞城市等。

「飛天小女警」「花花」、「泡泡」及「毛毛」係美國一個都市嘅保護者。
Photo from 《飛天小女警》

《校園嬌娃》
《校園嬌娃》係法國 Marathon Media 公司製作嘅動畫,一共 5 季。故事講述由三位少女「森美」、「高麗」、「艾利斯」組成嘅「校園嬌娃」要冒險同執行任務,拯救世界。《校園嬌娃》係比較受歡迎嘅特務動畫,小編細個睇嗰陣覺得佢哋三個真係好型!

故事講述由三位少女「森美」、「高麗」、「艾利斯」組成嘅「校園嬌娃」要冒險同執行任務,拯救世界。
Photo from 《校園嬌娃》

《棋靈王》
《棋靈王》講述小學六年級嘅「進藤光」喺爺爺屋企翻找古老圍棋棋盤時,意外遇上古代棋手「佐為」,並被「佐為」俯身,進軍圍棋界。《棋靈王》係經典嘅動畫,而最近內地翻拍《棋靈王》真人版,一眾網民大呼毀童年!

《棋靈王》講述小學六年級嘅「進藤光」意外遇上古代棋手「佐為」,並被「佐為」俯身,進軍圍棋界。
Photo from 《棋靈王》

《彩夢芭蕾》
《彩夢芭蕾》講述女主角原本係一隻小鴨,因為傾慕王子而變成人形,成為傳說中嘅芭蕾公主「千千」,仲要幫王子搵返「心之碎片」。不過「千千」唔可以向王子表白,否則就會化作光點消失。動畫入面角色嘅服裝都好靚,特別係「千千」嘅芭蕾舞衣,而且跳芭蕾舞嘅畫面好唯美~

動畫入面角色嘅服裝都好靚,特別係「千千」嘅芭蕾舞衣,而且跳芭蕾舞嘅畫面好唯美~
Photo from 《彩夢芭蕾》

《小魔女 DoReMi》
《小魔女 DoReMi》絕對係冇人唔識嘅卡通,小編當年一定會準時坐定定等佢播。故事講述主角「DoReMi」同佢嘅好朋友成為魔女見習生,仲一邊幫忙經營魔法物品店舖「魔法堂」,佢哋喺日常生活會用魔法幫助身邊嘅人。

《小魔女 DoReMi》絕對係冇人唔識嘅卡通。
Photo from 《小魔女 DoReMi》

《哈姆太郎》
《哈姆太郎》講述由小學五年級學生「小露」飼養嘅黃金鼠「哈姆太郎」嘅故事。「哈姆太郎」同一班朋友成立「哈姆朋友」秘密基地,每日都會偷走出去同朋友玩,每日都有唔同嘅驚喜等緊佢哋。《哈姆太郎》入面有一句經典台詞「今日好開心啊,聽日一定會更加開心嘅啫!」呢句台詞就成為咗小編小學每一篇週記嘅結尾。

「哈姆太郎」同一班朋友成立「哈姆朋友」秘密基地,每日都有唔同嘅驚喜等緊佢哋。
Photo from 《哈姆太郎》

回顧返呢幾套卡通動畫,真係十分懷念~又係時候感嘆時光飛逝⋯⋯

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel

Share to Facebook
Our Facebook Videos
我們的 Facebook 影片
You may also like
你可能也喜歡
李根大尉醫院療傷照曝光 將返韓國養傷 望復原後重回烏克蘭作戰
李根大尉醫院療傷照曝光 將返韓國養傷 望復原後重回烏克蘭作戰
5 hours ago
夏雨暫時定居墨西哥,化身KOL介紹當地美食!原來呢樣海鮮最抵食?
夏雨暫時定居墨西哥,化身KOL介紹當地美食!原來呢樣海鮮最抵食?
5 hours ago
印度新郎婚禮暈倒一秒變禿頭,新娘發現戴假髮受騙崩潰悔婚!
印度新郎婚禮暈倒一秒變禿頭,新娘發現戴假髮受騙崩潰悔婚!
7 hours ago
19歲孕妻豪送百萬林寶堅尼 老公喜極而泣 網民卻指用錢買愛情?
19歲孕妻豪送百萬林寶堅尼 老公喜極而泣 網民卻指用錢買愛情?
21 hours ago
【泰女星墮河案】Tangmo媽媽堅持今午進行火化!生前手機去向不明!爆料者身份依然成謎?
【泰女星墮河案】Tangmo媽媽堅持今午進行火化!生前手機去向不明!爆料者身份依然成謎?
a day ago
李佳芯以健康為由辭演新劇 坦言唔想長期通宵拍劇 驚身體再出事
李佳芯以健康為由辭演新劇 坦言唔想長期通宵拍劇 驚身體再出事
a day ago
Hottest Articles
最熱文章
英國男子收留烏克蘭難民後拋妻棄女!與美女相處10日堅決私奔
英國男子收留烏克蘭難民後拋妻棄女!與美女相處10日堅決私奔
2 days ago
林芊妤被網友爆料蘭桂坊與外國人去蒲?Coffee置頂留言大反擊
林芊妤被網友爆料蘭桂坊與外國人去蒲?Coffee置頂留言大反擊
a day ago
泰國女星Tangmo墮海案有新進展!FB突然翻生,持續更新事發當日照片?!盤點最有力嫌疑人!
泰國女星Tangmo墮海案有新進展!FB突然翻生,持續更新事發當日照片?!盤點最有力嫌疑人!
2 days ago
【泰女星墮河案】Tangmo媽媽堅持今午進行火化!生前手機去向不明!爆料者身份依然成謎?
【泰女星墮河案】Tangmo媽媽堅持今午進行火化!生前手機去向不明!爆料者身份依然成謎?
a day ago
夏雨暫時定居墨西哥,化身KOL介紹當地美食!原來呢樣海鮮最抵食?
夏雨暫時定居墨西哥,化身KOL介紹當地美食!原來呢樣海鮮最抵食?
5 hours ago
KKPlus天線得得B被5歲童挨跌評論大反轉!爸爸稱錯怪兒子好心痛
KKPlus天線得得B被5歲童挨跌評論大反轉!爸爸稱錯怪兒子好心痛
a day ago