網民嚴選「10大最想佢復出藝人」黎姿排名高過朱千雪 呢位男星攞第一?

網民嚴選「10大最想佢復出藝人」黎姿排名高過朱千雪 呢位男星攞第一?

娛樂新聞
By Cheryl on 31 Mar 2022
Digital Editor

不少藝人都因家庭、健康或事業等原因突然息影,令觀眾非常不捨。近日,有網民嚴選出10位「最想佢復出藝人」,當中包括女星如朱千雪徐子珊、郭藹明等,而男星就只有兩位,其中一位更勇奪榜首!以下立即睇下有無你嘅心水藝人啦!

#10 麥明詩

麥明詩(Louisa)於2019年開始淡出演藝圈,轉投商業顧問工作,直至去年遇上「金牌監製」戚其義,之後決定向公司請了約20日假期,拍攝佢監製和執導嘅網劇《逐流時代》。劇集近日於AMM首播,麥明詩在當中有長達45秒嘅三點式泳裝戲份,非常搶眼,網民都大讚佢身材誘人,並希望佢可以正式復出,參演更多作品。

麥明詩淡出娛樂圈後專注於商業顧問工作。Photo from 麥明詩IG

麥明詩在《逐流時代》中有火辣泳裝鏡頭。Photo from 《逐流時代》劇照

#9 吳美珩

吳美珩富有氣質,佢嘅父母都係醫生,家中有4姊妹,年幼時曾到美國生活。吳美珩在90年代後期至千禧初期曾拍攝多套電視劇,並多次與江華合演情侶。其實佢2001年就已經與百億富商王華麟在台灣結婚,直到2007年才正式向外公佈,同年7月亦誕下一名女兒。自此佢退出幕前,專心在家相夫教子,直到2011年再誕下一名兒子。

吳美珩2001年結婚,07年終對外公佈。Photo from 劇照

佢同鄭裕玲(DoDo姐)、宣萱、顧紀筠等女星份屬好友,去年佢哋聚會嘅合照被DoDo姐上傳社交網,可見佢保養得宜,令唔少網民都表示好想再睇佢拍戲。

吳美珩與DoDo姐等人老友鬼鬼。Photo from 鄭裕玲 IG

#8 郭藹明

郭藹明本身係一名高材生,曾到美國南加州大學修讀機械工程學,又曾在當地私人航天公司實習過一年多。後來佢成為演員,並在拍攝電視劇時和劉青雲結緣。二人在1998年結婚,之後女方都減少參與演藝工作,最後一部作品係2006年在亞視播映嘅《義無反顧》。佢同老公在近年不時以夫妻檔接拍廣告,當係過下戲癮,但其他時間都專注於個人生活,享受二人世界。

兩公婆現時依然恩愛。Photo from 廣告截圖

#7 郭可盈

家境富裕嘅郭可盈參加選美比賽後入行,參演多套電視劇人氣不俗。佢2004年與林文龍拉埋天窗,到2010年誕下寶貝女Tania。佢最後一部作品於2009年播出,之後都淡出幕前,專心照顧家庭。一家現時住在西貢一間4層獨立屋,環境相當闊落。郭可盈早前為囡囡在豪宅舉辦生日派對,又在家中大花園搭起帳篷與愛犬玩樂,相當惬意。

郭可盈氣質滿滿Photo from 郭可盈 IG

郭可盈一家幸福美滿Photo from 郭可盈IG

#6 關詠荷

關詠荷本來任職文員,其後於1987年經朋友介紹,幫香港浸會學院傳理系學生拍攝了一些功課作品,自此對演戲產生興趣。正式成為演員後,富有觀眾緣嘅關詠荷拍了多套深入民心嘅電視劇。到2003年,佢同張家輝結束10多年愛情長跑,到澳洲註冊結婚,並在2006年誕下愛女Brittany。之後,關詠荷雖然有拍攝少量作品,但大多時間都專注家庭,佢最後一部電視劇在2013年播出。佢曾在訪問表示,佢認為女性到了某一個年紀,結婚有家庭後係要作出一點讓步,真係非常顧家。

關詠荷在90年代拍攝多套電視劇。Photo from 討論區截圖

廣告
廣告

#5 徐子珊

徐子珊2004年奪得選美冠軍後正式入行,曾拍多套電視劇為人熟悉。佢到2015年開始積極進修,修讀專業珠寶設計及彩色寶石專業課程,又以半工讀形式完成香港大學嘅心理學碩士課程。到2019年佢宣佈息影,並曾表示打算到歐洲攻讀心理學博士課程。退出演藝圈後,徐子珊生活低調,更注銷了社交帳戶。但近日有網民上載影片,子珊在片中透露將出席一個慈善活動,消息令一眾粉絲相當興奮。

徐子珊曾拍多套電視劇,令人印象深刻Photo from 徐子珊 微博

徐子珊近日透露將參與慈善活動。Photo from 網上截圖

慈善活動海報Photo from 網上圖片

#4 江華

江華2004年後轉到內地發展,佢自爆曾患上抑鬱症,之後轉行擔任保險經紀。近年佢積極拍攝抖音短片,早前更嘗試做直播帶貨賣首飾,但反應麻麻。不少粉絲都希望佢轉而復出,重投拍戲工作。

江華近年活躍於內地社交網。Photo from 江華 微博

#3 朱千雪

朱千雪奪得選美季軍後入行,係不少網民心目中嘅女神。佢在2016年修畢香港中文大學企業傳播社會科學系碩士學位,又在同年9月修讀香港城市大學法律博士學位,到前年加入一間律師樓成為旗下大律師。千雪在前年開始無再參演電視劇,現時粉絲只能透過其社交帳戶得知其近況,不少人都希望可再次見到佢進行拍攝工作。

不少網民都希望再見到朱千雪拍戲。Photo from 朱千雪 IG

#2 黎姿

黎姿(現名馬黎珈而)14歲加入娛樂圈,自90年代開始成為經典女演員。之後,佢因為想專心照顧因車禍重傷嘅弟弟,以及幫忙打理佢嘅皮膚護理中心而減少拍劇,並在2010年宣佈全面退出娛樂圈。黎姿在2009年對外宣佈已和商人馬廷強結婚,二人現時育有3女。現時佢積極發展醫學美容生意,亦不時在社交網分享近況。

黎姿現時積極打理醫學美容事業。Photo from 黎姿 IG

#1 黃子華

黃子華力壓一眾女星,成為網民最想佢復出嘅藝人。雖然子華神仍有拍攝廣告,但最後一套電視劇已經要數到去2013年。而且佢在2018年舉行嘅「金盆𠺘口」亦係佢最後一次做棟篤笑。所以不少粉絲都希望佢正式重返演藝圈,推出更多劇集和電影作品。

好多粉絲都想黃子華再拍劇。Photo from 黃子華 - 子華本部 FB

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel