日本垃圾站驚現1千萬円！警方收13市民報失！唔見錢理由超離譜

By Wing Ws on 08 Mar 2023

Digital Content Writer

相信唔少人都有遺失錢財嘅經歷，如果只係零錢可能冇所謂，但如果係一筆大額金錢，必然會相當焦急！今年1月，日本札幌市一間資源回收設施發現現金1000萬円（約港幣57萬元），消息流出後，警方收到逾10名市民報失，聲稱自己為該1000萬円失主，理由各式各樣，有啲仲好離譜。

Photo from FNNプライムオンライン YouTube

據日媒報道，今年1月，札幌市北區一間資源回收設施於廢紙回收垃圾站，一名垃圾分類工人從牛奶盒等回收垃圾嘅分類紙張中發現1000萬円現金，警方以「拾得物」受理並搜尋失主，在消息發佈當日下午3時，警方便收到5名市民查詢、3人報失。截至上周五（3日），警方一共接獲13人指遺失該1000萬円。

Photo from Yahoo!ニュース網站

而呢13宗報失理由亦五花八門，當中，有陳述指「開車去西區購物時，從（商店的）停車場步行中途，跌咗用報紙包住嘅1000萬円」、「屋企嘅衣櫃有現金1000萬円，但我搵唔返，可能係我揼咗落垃圾桶」、「唔見咗1000萬円」、「喝醉酒發現唔見咗1000萬円」、「患有認知障礙嘅祖父母連同垃圾一併揼落垃圾桶」、「（工作期間）唔見咗1000萬円，放喺架車嘅袋得現金唔見咗」、「唔見咗20萬円，可能喺嗰1000萬円當中」，甚至有無厘頭嘅原因：「有熟人問我『係咪唔見咗』」，但據指本人冇將現金揼咗嘅記憶。更誇張嘅係，當中有幾宗為非當地人報失，有人話係旅行中丟失，有來自京都嘅男性指，家中嘅幾千萬円冇咗，而個女以前住喺札幌，懷疑係同個女有關係嘅人偷咗。

Photo from FNNプライムオンライン YouTube

有關報道引起熱議，唔少日本網民紛紛留言斥責報失者說謊嘅行為可恥，認為唔應該通過呢種方式得到唔屬於自己嘅錢財，並要求警方處以「詐欺罪」拘捕。

Photo from YouTube

警方現時仍未搵到該1000萬円失主，據報，如果4月30日仍未確定失主，呢1000萬円就會「充公」歸於札幌市所有。另外，有律師就勸籲市民唔應該冒認失主，因為通過提交報失而企圖得到唔屬於自己嘅物品已構成「詐欺未遂罪」，並建議有關市民盡早撤銷報案。

Photo from 北海道ニュースUHB YouTube

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

東張西望｜港媽網戀愛上菲律賓男，不惜賣樓花160萬相救！攞錢理由超離譜，港媽仍深信不疑

7 Dec 2022

《東張西望》一向都有報道騙案，但最近有觀眾報料指情郎被困，想搵節目組幫手，點知節目發現係網上騙案。雖然騙徒嘅謊言十分離譜，但事主陳女士仍堅信對方，更不惜賣樓花160萬相救！令主持人十分無奈。

Photo from 《東張西望》

陳女士網上結識「聯合國醫生」

陳女士係單親媽媽，佢報料稱有朋友最近失聯，希望《東張西望》可以幫手搵到對方。但節目組卻發現事情唔係咁簡單，一開始陳女士嘅「朋友」以「Chung Young」呢個名喺IG私訊陳女士，「Chung Young」外型高大威猛，佢自稱係一名聯合國整形外科醫生，目前正在戰區工作，男方大讚陳女士真城善良，好快就獲得陳女士信任。

Photo from 《東張西望》

聯合國醫生「Chung Young」多次提出要錢助佢離開，陳女士不惜賣樓花160萬相救

得知男方喺戰區工作隨時會有危險，陳女士十分心痛：「我聽完個心好似被人挖咗出嚟咁...」而男方亦指希望可以離開當地，並提議陳女士先做佢「掛名老婆」，但指要支付$5萬元先走到，為幫助「Chung Young」，陳女士將$5萬寄到所謂「聯合國辦公室」，但之後「聯合國辦公室」卻表示雖然「Chung Young」醫生可以離開，但要再支付多一筆機票錢，有3個價格，分別係11萬、20萬、30萬。

Photo from 《東張西望》

主持人即問：「點解機票要咁貴嘅？」陳女士指當地係禁區，出入要搭私人飛機。跟住「Chung Young」又指佢個女病咗，需要帶多一位醫生一齊走，「Chung Young」表示女兒好中意陳女士，仲叫陳女士做「媽媽」，由於情況緊急，即使「Chung Young」女兒張相明顯唔妥，但心急嘅陳女士未有留意，前後共花160萬，更不惜賣樓救「Chung Young」。

Photo from 《東張西望》

P圖現端倪，揭「Chung Young」用菲律賓演員Eric Quizon假相呃人！

「Chung Young」十分感激陳女士，陳女士大方指：「唔使客氣，只要你平安返嚟就得。」但「Chung Young」之後又指佢喺機場被人拉咗，原因係有人喺佢行李放咗違禁品，要再支付85萬先放返出嚟，隨後仲有「律師」將「Chung Young」嘅相片send畀陳女士睇，但呢張相十分古怪，被節目組揭穿係P圖。